«Бақты-Аягөз» телімінде құрылыс қызу жүріп жатыр
Абай облысы бойынша меншікті тілші
Семей магистральдық желі бөлімшесінің директоры Айдын Шәукежанов бастаған бір топ теміржолшы облыстық әкімдік өкілдерімен бірге «Бақты-Аягөз» жаңа теміржол желісінің құрылысы жүргізіліп жатқан аумаққа барып, атқарылып жатқан жұмыс барысын қадағалап қайтты.
Қазіргі күні тың жоба күнгей өңірде қызу қарқынмен жүргізіліп жатыр. Жаңа желінің 85,3 шақырымы Мақаншы ауданы аумағы арқылы өтеді. Арнайы топ құрылыс жүргізіп жатқан Қытайдың «China Harbour Engineering Company Ltd» компаниясы басшылығымен жүздесті. Қазіргі таңда теміржол құрылысының жалпы аумағында 1137 адам мен 740 техника жұмылдырылған. Соның аясында Ай, Шынқожа, Таскескен, Шолпан, Текебұлақ, Үржар және Бақты аумақтарында арнайы вахталық қалашықтар дайындалған. Болашақта бұл жерде осы атаулармен жаңадан теміржол станциялары бой көтеретін болады.
Жаңа желі 43 жер пайдаланушының жалпы аумағы 846 гектардан асатын жер телімдері арқылы өтеді. Осыған байланысты мемлекет мұқтажы үшін арнайы акт рәсімдеу жұмыстары жүріп жатыр. Сондай-ақ өңір бойынша құрылысқа қажетті материалдарды өндіру үшін 9 карьер белгіленген. Оның ішінде бірнеше учаске ұзақ мерзімге жалға берілген жерлер аумағына кіреді.
Жоба аясында жаңадан ашылатын Бақты станциясы аумағында құрғақ порт пен индустриялық және логистикалық аймақтарды дамыту жоспарланып отыр. Бұл өңірдің транзиттік әлеуетін арттырып, шекара маңындағы экономикалық белсенділікті күшейтуге мүмкіндік береді.
Бүгінгі таңда екі ел арасында 28 млн тоннадан астам жүк тасымалы бар екен. Ал жаңа теміржол іске қосылғанда тағы 8 млн тоннаға дейін арттыру жоспарланып отыр. Жалпы айтқанда, 300 шақырымнан асатын жаңа желі – еліміз үшін маңызды стратегиялық жоба. Абай облысының Аягөз, Үржар, Мақаншы аудандарының аумағынан өтетіндіктен жолаушы тасымалы бойынша да айрықша саналады. Жалпы, бұл жолғы сапар барысында айқындалғандай, инвестор компания құрылыс барысын қарқынды жүргізуде. Оларға жергілікті атқарушы билік тарапынан да көмек көрсетілуде. Ал құрылыс барысы Семей магистральдық желі бөлімшесі басшылығының бақылауында тұр.