«ҚТЖ-Жүк тасымалы» ЖШС-не қауіпсіздік сертификаты берілді
«ҚТЖ-Жүк тасымалы» ЖШС Теміржол көлігі саласындағы қауіпсіздік сертификатын алды. ҚР Индустрия және инфрақұрылымдық даму министрлігіне қарасты Көлік комитетінің елордалық көліктік бақылау инспекциясы табыстаған бұл құжат тасымалдау процесінің қауіпсіздігі мен сенімділігі сақталып отырғанын куәландырады.
«ҚТЖ-Жүк тасымалы» ЖШС-нің Қауіпсіздікті басқару жүйесі Қазақстанның теміржол көлігі саласы заңнамасында белгіленген талаптар үдесінен шығып отырғанын айғақтайтын құжаттың жарамдылық мерзімі 2024 жылға дейін.
«Сертификат теміржолда пойыздар қозғалысының қауіпсіздігін қамтамасыз ету саласындағы процестердің жоғары деңгейде ұйымдастырылғанын растайды. Осы ретте, қозғалыс қауіпсіздігін бұзу тәуекелдерін бағалау және қауіптерді анықтау алгоритмі әзірленгенін атар едік. Әдетте, қауіпсіздікті бұзу себептері есепке алынып және талдау жүргізіледі. Ал алдағы уақытта талдау деректері негізінде келеңсіз жағдайларға жол бермеу үшін алдын алу шаралары әзірленбек», – дейді «ҚТЖ-Жүк тасымалы» ЖШС қозғалыс қауіпсіздігі департаментінің бас менеджері Қанат Мұсабеков.
Айтып өткеніміздей, құжаттың қолданылу мерзімі 2024 жылдың соңына дейінгі уақыт аралығын қамтиды. Алайда, осы үш жыл ішінде қозғалыс қауіпсіздігін өрескел бұзған немесе қозғалыс қауіпсіздігі бойынша нысаналы көрсеткіштерді орындамаған жайттарға жол берілсе, сертификат өз күшін жояды.