2022 жылы темір жол саласындағы жастарды қолдауға арналған арнайы бағдарлама жүзеге аспақ
«Қазақстан теміржолшысы» газетінің тілшісі
Ұлттық компанияда 2022 жылдан бастап жастарды қолдап, дамытуға бағытталған «Жас Темір» бағдарламасы іске қосылмақ. Бұл «Самұрық-Қазына» АҚ-ның «Жас Өркен» жастар бағдарламасының баламасы іспетті болады, деп хабарлайды Rail-news.kz. Бағдарлама мақсаты – ұлттық компания кәсіпорындарын білікті кадрлармен қамтамасыз ету. Бұл тәлімгерліктің үздік тәжірибесін енгізу және компанияны дамыту перспективалары есебінен жүзеге асырылады. Байқауға қатысушыларға қойылатын талаптар: ҚР азаматы болуы, Нұр-Сұлтан қаласында тұруы керек. Бағдарламаның мақсатты топтарына еңбек жолын «ҚТЖ» ҰК» АҚ-да бастап, кәсіби теміржолшыға айналуды көздейтін, саладағы ЖОО-ның 2020-2022 жылғы түлектері жатады. Жас мамандар бес кезеңнен тұратын конкурстық іріктеуден өтеді. Бағдарламаның басты артықшылығы – компанияның тәжірибелі қызметкерлерінің арасынан іріктелген жеке тәлімгерлер жетекшілігімен жас мамандарды жеделдетіп дамыту. Бағдарламаға қатысу кезінде жастар ұлттық компанияның құрылымдық бөлімшелерінде 3 ротациядан өтеді, әр ротация ұзақтығы – 5 ай. Бұл бағдарлама арқылы жастар неге қол жеткізеді десек: әр ротация алдында оқытылады, әрбіріне жеке тәлімгер бөлінеді, негізгі мамандық бойынша 3 ротация, ай сайын тұрақты жалақы, компания есебінен жатақхана, мақсатты жоспарлау және жеке даму жоспары, кәсіби мамандармен жұмыс.
«Басты қойылатын талаптарға сәйкес креативті және аналитикалық ойлау қабілеті бар теміржол саласы бойынша жоғары оқу орнын бітірген түлек болуы керек. Жол және жол шаруашылығы, электрмен жабдықтау, маркетинг және логистика, тасымалды ұйымдастыру саласы бойынша жұмыс іздегендер келе алады. Шілде айында іріктеу қорытындысын шығарамыз. Үміткерлер арасынан 10 адам таңдалып алынады», – дейді компанияның персоналды басқару департаментінің директоры Сәуле Истлеева.
Бағдарлама қорытындысында жоғары нәтиже көрсеткен қатысушылар жұмысқа орналастырылады. Қатысушылар тарапынан қабылдау 2022 жылдың 1 қаңтарынан басталады. Компания теміржол саласында кәсіби маман болуды армандайтын талантты жастарды осы бағдарламаға қатысуға шақырады.