«Тұлпар-Тальго» зауытына – 10 жыл
«Қазақстан теміржолшысы» газетінің тілшісі
Биыл елордада ТМД бойынша баламасы жоқ «Тұлпар-Тальго» зауытының ашылғанына – 10 жыл. Жүрдек жолаушылар пойызының вагондарын шығаратын зауыт құрылысы «ҚТЖ» ҰК» АҚ мен испандық «Patentes Talgo» компаниясының бірлескен жобасы нәтижесінде жүзеге асырылған еді, деп хабарлайды Rail-news.kz.
Бүгінде Қазақстан темір жолындағы жолаушы тасымалының жүрдек пойыздар легін құрап отырған отандық өндірістен шыққан вагондар еліміздің барлық аймақтарына қатынайды. Үдемелі инновациялық-индустриалды даму мемлекеттік бағдарламасы аясында «Қазақстан темір жолы» компаниясы салған зауыттың жобалық қуаты жылына 150 вагон өндіруге қабілетті. «Тұлпар» вагондары сонымен қатар, жыл өткен сайын жетілдіріліп отыр. Бірінші кезекте, вагондардың барлық түрлерінің интерьерлік дизайнына өзгерістер енгізілді. «Турист» вагондарының отыруға арналған орындықтары бар мүлдем жаңа түрлері әзірленді. Ал Бизнес-класс және Гранд-класс вагондары барлық қолайлылық қажеттіліктерімен қамтылған. Вагондар Қазақстанның климаттық жағдайына бейімделген, жылдамдығы сағатына 350 шақырымға дейін есептелген. Таяуда зауытқа барған сапарында «ҚТЖ» ҰК» АҚ басқарма төрағасының орынбасары Қанат Әлмағамбетов пен «Ремлокомотив» АҚ басшысы Талғат Лесов оның жұмысына жоғары баға берді. Сондай-ақ, өндіріс орнының бұдан арғы жұмысын оның жаңа инвесторы – швейцариялық компания қолға алатыны белгілі болды. Олармен алдағы 10 жылға келісімшарт жасалыпты. Айта кетейік, Қазақстандағы машинажасау саласының дамуында үлкен маңызға ие зауытта осы он жылда 845 вагон шығарылған. Оның ішінде 674 вагон «Patentes Talgo» технологиясымен жасалса, қалғаны Тверь вагон құрастыру зауытының технологиясы бойынша өндірістен шыққан.