ҚТЖ өндірістік қызметкерлерінің жалақысын көтеру үшін 70 млрд теңге бөлінеді
«Қазақстан теміржолшысы» газетінің тілшісі
«Қазақстан темір жолы» ҰК» АҚ-да Ұлттық компания директорлар кеңесінің отырысы өтті. Отырыстың күн тәртібінде бірнеше мәселе қаралды, деп хабарлайды Rail-news.kz.
Ұлттық компанияның жаңа құрылымы бекітілген Директорлар кеңесінің отырысында «Самұрық-Қазына» АҚ әзірлеген іс-шаралар жоспарын іске асыру сөз болды. Сонымен қатар, биыл, 2022 жылдың 1 қаңтарынан бастап «ҚТЖ» ҰК» АҚ өндірістік қызметкерлерінің жалақысы өсті. Бұл мақсатқа компания тарапынан 70 млрд теңге бөлініп отыр.
Әрине, бұл – сала еңбеккерлері үшін жағымды жаңалық. Ауа-райының қолайсыздығына қарамай, жыл он екі ай ауыр жұмыс атқаратын өндірістегі жұмысшылардың жағдайы бәрінен бұрын қарастырылып, еңбегіне қарай алатын жалақысы да сай болуы керек. Ұлттық компанияда осыған басымдық беріліп отырғаны теміржолшылар көңілінен шығатыны анық. Жалпы жыл басталысымен барлық құрылымдық мекемелер өткен жылға есеп бере бастауы – дәстүрлі шара. Өткен аптада кадр саясаты бойынша былтырғы атқарылған жұмыстар қорытындыланған. Енді директорлар кеңесі жағым- ды жаңалықпен қуантып отыр. Былтыр компания қызметкерлерінің айлық жалақысы 22 пайызға өскені белгілі. 2021 жыл ұлттық компания үшін табысты жыл болып отыр, жүк айналымы 239 млрд т-км неттоға жеткізіп, Қазақстан арқылы өтетін транзит 1 млн ДФЭ-ден асқан. Мың шақырымнан астам темір жол жаңартылса, соның ішінде 582 км бойынша күрделі жөндеу жүргізілген.