Он шақты жыл бұрын салынған «Өзен-Түркіменстан» теміржолы бүгінде шеттегі қандастарымыз үшін тарихи отандарына ашылған алтын қақпаға айналғандай. Өткен жылдан бері осымен төртінші көш – темір жол көлігімен алыстағы ағайынның кезекті легі елге жеткізілді.
23 ақпан күні Түркіменстан теміржолына қарасты 16 вагоннан тұратын жолаушы пойызымен 265 адам елге оралды. Шекарадағы Болашақ станциясына аялдаған жолаушы пойызы қажетті тексерістен өтті. Станция басшысы Мақсат Нұрбеков бастаған арнайы мекеме өкілдері пойызды қарсы алып, жолаушылардың өтініш-тілегіне орай қызмет көрсетті.
– Түркіменстандық қоныс аударушылар- ды алып келген №8801 жолаушы пойызы Нұр-Сұлтан қаласы уақытымен сағат 18:41-де екінші жолға келіп тоқтады. Станциядағы технологиялық жұмыс процесі бойынша мұқият тексеріліп, үш сағаттан аса аялдады. Жолаушылардың тілек-талабын қанағат- тандырып, қажет нәрселермен қамтамасыз еттік. 21:48-де пойыз Өзен станциясына жөнелтілді. Құрамда 14 жолаушы вагоны, 1 жүк вагоны, 1 дизель генератор вагоны болды. Өткен жылы да үш рет осылай қандастарымызды күтіп алып, ақпан, мамыр, шілде айларында 150-160 адам елімізге қоныс аударған болатын. Бұл жолы вагонның да, жолаушының да саны әлдеқайда көп, – дейді Болашақ станциясының бастығы.
Қандастар мінген пойызды Өзен станциясында да жергілікті станция басшылығы мен Жаңаөзен қаласы әкімінің орынбасары бастаған топ күтіп алды. Сонымен қатар, оларды қарсы алуға келген туған-туыстарының да қарасы мол болды. Алыстан ата мекенді аңсап жеткен қандастарды құшақ жая қарсы алып, ағайын-туыстар шұрқыраса табысып жатты. Соның ішінде осы қалада тұратын ұлына келе жатқан Ақбибі Садықова мен оның ұлы Ұланбек Садықов та бір топ туыстарымен қауышып, мәре-сәре.
«Қанша уақыттан бері аңсаған арманымыз бүгін орындалып, қуанышымызда шек жоқ. Осындай мүмкіндік жасап отырғандарға алғысымыз шексіз» деді көзіне жас алған Ақбибі апа. Көрші елдің вагондарына жергілікті вагон қараушылар қажетті техникалық қызмет көрсетіп, машинистер бригадасы ауысып, маневр жасалып, түнгі 01:13-те қайта жолға салды. – Қоныс аударушылардың дені – Маңғыстауға орналасушылар. Ішінде тек сегіз адам өзге облыстарға кететіндер. Нұр-Сұлтан қаласына, Ақтөбеге бір-бір отбасы, Шымкентке төртеуі орналаспақ. Екі отбасы Алматыға кетуді жоспарлаған. Бәрін де жақындары қарсы алып, үйлеріне алып кетті. Тәртіп бұзушылықтар, басқа да деректер тіркелген жоқ, – дейді Маңғыстау станциясындағы ЖПП көші-қон қызметі тобының аға инспекторы Еркінбек Болтеков.
