Оңтүстік пен солтүстік арасына тікелей темір жол салу мәселесі көтерілді
«Қазақстан теміржолшысы» газетінің тілшісі
Осы аптада Мәжілістің жалпы отырысында депутаттар еліміздің оңтүстігі мен солтүстік өңірлерінің арасын жалғайтын теміржол көлігіне қатысты мәселені көтерді. «Серпін» бағдарламасының тиімділігі үшін жаңа пойыз бағдарларын ашу ұсынылды.
Осы орайда Үкімет басшысының бірінші орынбасары Роман Склярдың атына сауал жолдаған депутат Фахриддин Қаратаев:
Депутат қазақстандықтардың басым бөлігі теміржол тасымалы қызметін пайдаланатынын еске салды. «Оның себебі пойыз қауіпсіз көлік екендігіне, маршруты мен жүріп-тұру кестесінің ыңғайлылығына және билет құнының қолжетімділігіне байланысты.
Дегенмен де, шешімін таппай отырған мәселе – ол солтүстіктегі Қостанай, Павлодар өңіріне қоныс аударып жатқан халықтың қатынауы өте қиын. Әсіресе көшкен жастардың ата-аналары, қарттары, балаларымен, жүктерімен жүру қиынға соғуда. Мысалы, халық Түркістан облысынан Қостанай аумағына дейін қатынау үшін Алматы, Қарағанды немесе Нұр-Сұлтан қалалары арқылы пойыздардың уақыттары бір-біріне сәйкес келмей жарты күн, кейде бір күн күтуге тура келеді. Тіпті кейбірі такси жалдап баруға мәжбүр, бұл өте өзекті және кезек күттірмес үлкен мәселеге айналып отыр», – деген депутат жоғарыдағы жағдайларды ескере отырып, «Серпін» бағдарламасының тиімділігін арттыру мақсатында «Қызылорда-Түркістан-Шымкент-Жамбыл-Қостанай» бағытындағы жолаушылар пойызының ашылуына ықпал етуді сұрайтынын жеткізді.