ҚТЖ астанада наурыз мерекесін дүркіретіп өткізбек

Биылғы Наурыз мерекесін теміржолшылар кең көлемде атап өтпек. Бүгін «Нұрлы жол» теміржол вокзалы кешені аумағына бара қалсаңыз, алтықанат ақ шаңқан үйлер тігілген этно-ауылға тап боласыз. Мұнда ертең елордалық теміржолшы қауым наурыз думанына жиналады.

  Мемлекет басшысы Қасым-Жомарт Тоқаевтың Наурыз мейрамын 10 күн бойы атап өту туралы тұжырымдамасына сәйкес, әрбір күннің идеологиясы Компанияның Наурыз мерекесін тойлау шарасында көрініс тауып, қызметкерлердің барлық әлеуметтік топтары мен олардың отбасыларын қамту көзделген.

«Наурыз – көктем шуағы!» атты ұлттық салт-дәстүрлер мен әдеп-ғұрыптарды қамтитын байқау шеңберінде Компанияның филиалдары мен еншілес ұйымдары құда түсу, тұсау кесу, айтыс, бесікке салу, қыз ұзату, беташар қойылымдарын көрсетіп, ұлттық ойындар ойнатылып, мерекелік концертте әуезді ән мен күйден шашу шашылмақ.

Наурыз мейрамын бұқаралық тойлауға арналған алаңдар бірнеше бөлікке бөлінген. Мәселен, ұлттық асхана алаңында қонақтар дәмі тіл үй- ірер бауырсақ, палау, наурыз көжеден дәм татса, қолөнер алаңында теміржолшылар зергерлік бұйымдарды тамашалап, қолөнер шеберлік сабақтарына қатыса алады. Ал спорт алаңында теміржолшылар арқан тарту, асық ату, кір тасын көтеру, қол күресі сияқты ұлттық ойын сайыстарында күш таластырып, бақ сынауларына болады.

Сонымен қатар, бұл күні теміржолшылардың балаларына да өз өнерлерін ортаға салу мүмкіндігі тумақ. Яғни балғындар мен жасөспірімдер алаңында балалар ләңгі тебу, асық ату, дойбы ойнау секілді сайыстарға қатысып, сондай-ақ, қазақ халқының мәдениеті мен тарихы бойынша білімдерін таразыға салған викторина, аквагрим аймағында түрлі әрлендіру шараларында бақ сынай алады. Ал көңіл сергіту алаңында жұртшылық Қыдыр атаны күтіп алып, ақ батасын алатын театрландырылған қойылымды, билер мен ән-күйлерден құралған мерекелік концертті тамашалай алады.

Этно-ауылда тігілген «ҚТЖ» ҰК» АҚ еншілес ұйымдары мен филиалдарының киіз үйлерінің тақырыптық безендірілуі, ұлттық дәстүрлер мен ғұрыптардың, киімдердің таныстырылымы және мерекелік дастарханның ұйымдастырылуы Кәсіподақ және ардагерлер кеңесі өкілдерінен құралған комиссия тарапынан бағаланбақ. Қысқасы, қазақ халқының құндылықтары мен дәстүрлері арқылы корпоративтік мәдениетті нығайтуға бағытталған шара өз қонақтарын күтеді...