Қазақ-қытай теміржолшылары алыс-берісті биылдыққа 17,6% көбейтуге уағдаласты
«Қазақстан теміржолшысы» газетінің тілшісі
Қазақстан мен Қытай Халық республикасы арасында теміржол көлігімен жүк тасымалдау көлемі 17% өседі. Бұл туралы теміржол ынтымақтастығы ұйымының кезекті отырысында мәлім болды.
Бейнеконференциялық байланыс режимінде өткен ТЖЫҰ-ның (теміржол ынтымақтастығы ұйымы) Жүк тасымалдары жөніндегі комиссиясының отырысы бірқатар уағдаластыққа негіз болды. Оның жұмысына Қазақстан, Вьетнам, Монғолия, Ресей, Өзбекстан және Корея теміржол әкімшіліктерінің өкілдері қатысты. Қазақстандық делегацияны «ҚТЖ-Жүк тасымалы» ЖШС бас директорының маркетинг және жоспарлау жөніндегі орынбасары Ерсін Хасенов басқарды.
Кеңеске қатысушылар 2022 жылға арналған экспорттық, импорттық және транзиттік жүктерді теміржол көлігімен тасымалдау көлемдерімен келісті. Жүктерді тасымалдаудың келісілген көлемін орындау жөніндегі техникалық және ұйымдастырушылық іс-шаралар қаралды.
Сонымен қатар, ҚР мен ҚХР арасындағы екіжақты кеңес барысында жүк тасымалдау көлемін өткен жылмен салыстырғанда 17,6% арттыру туралы уағдаластыққа қол жеткізілді.