Орта Азия көлік дәлізін дамытатын 10 жоба айқындалды
«Қазақстан теміржолшысы» газетінің тілшісі
ҚР Индустрия және инфрақұрылымдық даму министрі Қайырбек Өскенбаев Өзбекстан президенті Шавкат Мирзиеевтің қатысуымен өткен Бірінші Ташкент халықаралық инвестициялық форумына қатысып, сөз сөйледі.
Министр өз сөзінде жаһандық экономиканы түбегейлі трансформациялау кезеңінде Орталық Азия елдері экономикаларының даму қарқынын сақтау үшін өңірішілік өзара іс-қимылды нығайту қажет екенін атап өтті. Бірқатар бағыттар бойынша экономикалық кооперация республикалардың инвестициялық тартымдылығын сақтаудың тиімді тәсілі бола алады. Бұл ретте министр жоғары жылдамдықты «Түркістан-Шымкент-Ташкент» жолаушылар теміржол магистралі жобасын мысалға келтіріп, Орталық Азиядағы көлік дәліздерін дамытуға және жаңғыртуға назар аудару қажеттігін айтты.
Министрдің айтуынша, Қазақстанда барынша қолайлы институционалдық және инфрақұрылымдық жағдайлар жасалуда. Атап айтқанда, инвестициялық саясаттың жаңа тұжырымдамасы әзірленіп, инвесторларды қолдаудың жаңа құралы ретінде стратегиялық инвестициялық келісім енгізілді.