Автомотриса сатып алу жобасы іске аса бастады
«Қазақстан теміржолшысы» газетінің тілшісі
Теміржолдың электрмен жабдықтау шаруашылығында «Байланыс желісі үшін автомотриса сатып алу» жобасы жүзеге асырылып жатыр, деп хабарлайды Rail-news.kz.
Оның шеңберінде 2 бірлік АДМ техникасы Астана және Көкшетау электрмен жабдықтау дистанцияларына сатып алынып орнатылған. Бұл желілік бөлімшелердің арнайы өздігінен жүретін жылжымалы құрамының (АӨЖҚ) жарақтандыру деңгейін арттыруға және байланыс желісін ұстаудың технологиялық процесін орындауды қамтамасыз етуге ықпал етті.
Сондай-ақ, тартымдық электрмен жабдықтау құрылғыларына, яғни байланыс желісіне қызмет көрсетудің технологиялық процесін қамтамасыз ету үшін 10 бірлігіне күрделі жөндеу және бір АӨЖҚ-не қызмет ету мерзімін ұзарта отырып, күрделі жөндеу жүргізілген.
Электрмен жабдықтау шаруашылығы құрылғыларының сенімділігін арттыру бойынша да біраз жұмыстың басы қайырылыпты. Атап айтқанда, байланыс желісі бойынша 12187 шақырымға ағымдық жөндеу жүргізіліп, 230 мыңнан астам фарфорлық оқшаулағыштар диагностикадан өткен. Сондай-ақ, 30 мыңға жуық барлық типтегі оқшаулағыштар, 36 мыңнан астам байланыс желісінің тозған ішектері ауыстырылды.