Алдағы мамырда «Теміржол білгірлері» сайысы өтеді
«Қазақстан теміржолшысы» газетінің тілшісі
«ҚТЖ» ҰК» АҚ-ның 25 жылдығы және Сала кәсіподағының 30 жылдығы құрметіне компания қызметкерлері арасында онлайн түрде «Теміржол білгірлері» зияткерлер ойыны өткізілмек, деп хабарлайды Rail-news.kz.
Компанияның әлеуметтік саясат департаменті ұйымдастыратын ойынға Орталық аппаратпен қоса өңірлердегі барлық теміржолшылар қатыса алады. Биыл мамыр айына жоспарланған онлайн жарыс 3 кезеңнен тұрады. Оған қатысу үшін 5 адамнан тұратын команда құрып, формаға сәйкес толтырылған өтінімді 28 сәуірге дейін nurgali_dm@railways.kz. электронды поштасына жолдау керек. Бұл ойыннан жеңіп шыққандар «Самұрық-Қазына» АҚ өткізетін «Prime games» интеллектуалды ойынында ҚТЖ намысын қорғайды.
Байқау шарты бойынша жүргізуші экранға сұрақтарды шығарып, оған жауапты командалар арнайы бланкіге толтырып береді де ұйымдастырушыларға WhatsApp арқылы жолдайды. Әрбір кезең нәтижесі бойынша балл жинақталып, экрандағы турнир кестесіне шығарылады. Ойынға қатысу үшін бір командаға ортақ бір ноутбук және жақсы интернет керек. 2 сағатқа созылатын ойын барысында алдымен оларға ойын ережесі түсіндіріледі, бірінші кезең «60 секунд», екінші кезең «Киноаассорти», үшінші кезең «Музыкалық фестиваль» деп аталады. Қатысушылардан сұрақтарға жауап беруде шапшаңдық, тапқырлық, толық жауап беру талап етіледі. Бірінші кезеңде қатысушылар бір минут ішінде Қазақстанның және әлем теміржолына қатысты сұрақтарға жауап береді. Екінші кезеңінде теміржол туралы кинолардан үзінді көрсетіліп, соның қандай фильм екенін табу керек болады. Үшінші сайыста теміржол туралы әндер соңынан басына қарай ойнатылады, сайыскерлер соны дұрыс табуы қажет.