«Магистраль» форумында әкімшіліктен бизнес-серіктестікке көшу жайы талқыланды
«Қазақстан теміржолшысы» газетінің тілшісі
Жақында «Магистраль» сарапшылар форумында ҚТЖ-дағы адами ресурстарды басқару жүйесінің әкімшіліктен бизнес-серіктестікке көшу жайы сөз болды, деп хабарлайды Rail-news.kz
Еліміздегі ең ірі жұмыс беруші ҚТЖ-ның тәжірибесі мыңдаған адам еңбек ететін ұжымдағы әлеуметтік тұрақтылықты қамтамасыз ету тұрғысынан көпшіліктің қызығушылығын тудырады. «ҚТЖ» ҰК» АҚ Адами ресурстарды басқару департаментінің директоры Сәуле Истлееваның айтуынша, бүгінгі таңда компанияда 113 мың адам еңбек етеді, олар қажеттіліктері, қызығушылықтары бойынша жас шамасына қарай ішкі топтарға бөлінген. Осы қызметкерлердің әрбірінің қажеттіліктеріне қарай компанияда ынталандыру жүйесі жасалуда. Оған жастар, тұрғын үй саясаты және білім беру бағдарламалары мен марапаттар, сонымен қатар әлеуметтік пакеттер мен сыйақы жүйесі жатады. Кадр саясатының басты мәні де сонда жатыр, дәл сол тұрғыда аталған департамент компанияның даму стратегиясына үлес қосады.
Ал компанияның Адами ресурстарды басқару департаментінің аға HR бизнес-серіктесі Әсел Ақтаудың айтуынша, компанияда 2021 жылы жұмысшылардың айлығы екі рет көтерілген. Биыл өндірістік персоналдың айлығы төмен жалақы алатындарға басымдық беріле отырып өскен. Оған қоса компанияда өндірістік қызметкерлерді сыйақыландыру жүйесі енгізілді, бұл жүйемен 2025 жылға қарай барлық қызметкерлерді қамту көзделіп отыр.
– HR-қызмет бәсекелестік негізде персонал іріктеуден бастап, оларды салалық оқу орталықтарында оқытып, біліктілігін арттыруға дейінгі қауіпсіздікті қамтамасыз ету жұмыстарына да араласады, – деді «Магистральдық желілер дирекциясы» филиалының адами ресурстарды басқару департаментінің директоры Руслан Барбасов.
Эфир соңында қатысушылар әкімшіліктік HR-дан бизнес-серіктестіктің стратегиялық рөліне және «құжаттармен жұмыстан» «адамдармен жұмысқа» көшудің маңыздылығын атап өтті.