ҚТЖ басшысы Жеңіс күні және Отан қорғаушылар күнімен құттықтады
Құрметті әріптестер!
Сіздерді 7 мамыр – Отан қорғаушылар күнімен және 9 мамыр – Жеңіс күнімен құттықтаймын! Майданда да, тылда да жауға қарсы жанқиярлықпен шайқасқан қаһармандардың жеңіс туы мәңгі желбіреп, еліміздің тұтастығы мен тыныштығын қас қақпай күзетіп, халқымызға қорған болған ұлттық әскеріміздің айбыны арта берсін!
Екінші дүниежүзілік соғыста біздің даңқты бабаларымыз аласұрған дұшпанға тойтарыс беріп, астаң-кестеңі шыққан жарты әлемді аман сақтау үшін аянып қалмады. Ерен ерліктің, еңселі елдіктің рухын танытты. Сондықтан да бұл күн жадымызда халқымыздың қайсарлығы мен мұқалмас мінезінің айқын көрінісі ретінде сақталады. Біз кейінгі ұрпақ соғыстан оралмаған жауынгерлердің рұхына тағзым етеміз, арамызда аман жүрген ардагерлерге қарап бой түзейміз. Мұндай соғыс енді ешқашан болмасын деп тілейміз. Соғыс көрген ер тілегі, бейбіт замандағы ел тілегі осы.
Сол зұлмат жылдардың куәсі болған 2 908 теміржолшы бүгінде арамызда жүр. Оның 22-сі соғыс ардагері, 5-і жол қатынастары жөніндегі халық комиссариатының өкілі, 2881-і тыл – мылтықсыз майдан жауынгері. Ел басына күн туғанда қару асынып, сапқа тұрған алдыңғы буын теміржолшылардың азаматтығы, ерлігі – кейінгі толқынға үлгі-өнеге.
Алтайдан Атырауға, Алатаудан Арқаға дейін кең көсіліп жатқан ұлан-ғайыр жерімізді әр заманда найзаның ұшымен, білектің күшімен қорғаған батыр бабалар қандай да сый-құрметке лайық. Сол қаһармандардың аманатын арқалаған қазіргі сардарлар мен сарбаздар да даңқты жолды лайықты жалғастырары сөзсіз. Бірі жастық жігерін, бірі саналы ғұмырын әскери салаға арнап, күн-түн демей, ел тыныштығы үшін сапта жүрген жауын- герлеріміздің күш-қайраты сарқылмасын!
Құрметті жаужүрек, қайсар мінезді азаматтар! Осынау қуанышы мен қайғы- сы қатар жүретін мерекеде баршаңызға тіршіліктің ұзақ та жарқын, алаңсыз күндерін тілеймін. Отбасыларыңыз аман, денсаулықтарыңыз мықты болып, жақын адамдарыңыздың ықыласына бөлене беріңіздер. Еңбектеріңіз жемісті де жеңісті болғай!
Нұрлан САУРАНБАЕВ, «Қазақстан темір жолы» ҰК» АҚ Басқарма төрағасы