5 айда еліміздегі теміржолдардың бойына 40 шақырымдық қоршау орнатылды
«Қазақстан теміржолшысы» газетінің тілшісі
«ҚТЖ» ҰК» АҚ Қозғалыс қауіпсіздігі департаментінің директоры Марат Шакеновтың төрағалығымен 2022-2024 жылдарға арналған ҚР темір жолында мүліктің қауіпсіздігі мен сақталу деңгейін арттыру жөніндегі Жол картасын орындау мәселесіне қатысты дөңгелек үстел өтті, деп хабарлайды Rail-news.kz.
Теміржол кәсіпорындарының басшыларымен қатар көліктегі желілік ішкі істер органдарының жетекшілері қатысқан дөңгелек үстелде бірнеше мәселе қаралды. Алдымен Қазақстанның транзиттік әлеуетін арттыру және көлік-транзит секторының көшбасшылық рөлін нығайту мақсатында теміржол нысандарында бейнебақылау камераларын орнату мәселесі көтерілді. Магистральдық желі дирекциясы директорының вокзал шаруашылығы жөніндегі орынбасары Абай Досановтың айтуынша, темір жол вокзалдарында бейнебақылау камераларын орнату ҚР ИИДМ-де келісу сатысынан өтіп жатқан «ТТО объектілерін терроризмге қарсы қорғауды ұйымдастыру жөніндегі нұсқаулық» бекітілгеннен кейін басталмақ. Сонымен қатар ол вокзал перрондарында сауда жасау үшін Компания жалға алушылардан бірыңғай сауда дүңгіршіктері мен «мобильді сөрелерді» өз есебінен орнатуды талап ете отырып, бос алаңдар бөлгенін атап өтті.
«ҚТЖ-Жүк тасымалы» ЖШС бас директорының орынбасары – бас инженер Марлен Көкірекбаев Жол картасы шеңберінде атқарылған жұмыстар легінде, бейнебақылау жүйесімен 158 локомотивтің жабдықталғанын атап өтті. Сондай-ақ, бейне тіркеу функциясы бар борт жүйесі орнатылған ТЭ33Ас сериялы 37 бірлік жүк тепловозы сатып алынғанын жеткізді.
– Сарыағаш, Достық, Ганюшкино сияқты шекара маңындағы басқа да станцияларды АСКО ПВ заманауи техникалық құралдарымен жабдықтау, сондай-ақ, жұмыс істемей тұрған 17 бірлік АСК ГЦВ құрылғыларын қалпына келтіру бойынша іс-шараларды жоспарлап отырмыз. Осыған байланысты, шекара маңындағы Сарыағаш станциясында, сондай-ақ, Екібастұз және Жаңаауыл станцияларында «жылжымалы құрамды бейне талдау жүйесі» пилоттық жобасын өткізу жоспарланып отыр. Пилоттық сынақтардың нәтижелері бойынша «ҚТЖ» ҰК» АҚ шекара маңындағы теміржол станцияларын осы жүйелермен жарақтандыру жөніндегі іс-шараларды одан әрі іске асыру жоспары айқындалатын болады. Сонымен қатар вагон таразыларының санын ұлғайтуға қатысты 2022 жылдың соңына дейін жалпы сомасы 355 734 мың теңгеге 26 бірлік таразы сатып алу жоспарланып, қазір сатып алу бойынша конкурс өткізілуде, – деді Марлен Көкірекбаев.
«ҚТЖ-Жолаушылар локомотиві» ЖШС бойынша Жол картасын іске асыру шеңберінде 39 локомотив бейнебақылау жүйесімен жабдықталса, 2023 жылдың бюджетіне 63 локомотивке бейнетіркегіштер сатып алуды қосу бойынша жұмыстар жүргізілуде екен.
«ҚТЖ» ҰК» АҚ филиалы – Магистральдық желі дирекциясының қауіпсіздік жөніндегі атқарушы директоры Бахытбек Алдажаров, теміржол арқылы адамдардың қауіпсіз өтуі үшін және мал-жанның пойызға басылып қалуын болдырмау үшін биылғы бес ай ішінде 40 км жол бойына қоршау орнатылып, 68 км жол бойындағы қоршаулар жөнделгенін және де 249 тыйым салған белгілерді жаңарту көзделіп отырғанын мәлімдеді.