Оңтүстіктегі ахуал сақтық шаларарына баса мән беруді талап етеді

Еліміздің оңтүстігі – халықтың тығыз орналасқан және малды көп ұстайтын аймақ. Теміржолға жақын орналасқан ауыл халқының негізгі күнкөрісі де осы қорадағы ірілі-ұсақты төрт түлігі.

Оңтүстіктің ауа-райы жаз кезінде өте ыстық болған соң, көк тез қурап сарғаяды. Сол кезде қараусыз жүрген мал теміржол маңына қарай ойыса бастайды. Көктемнен бері малдың аузы тимеген теміржол қоршауының ішіндегі жап-жасыл шөп төрт түлікті «мен мұндалап» шақырып тұратын болса керек.

Түркістан облысының бес ауданы арқылы өтетін теміржолдың күтімін жасауға жауапты Арыс жол дистанциясының мамандары, тұрғындардың және теміржолшылардың ары-бері өтуіне арналған өткелдер адамдардың салғырттығынан көбінде ашық қалатынын, сол тұстан қараусыз мал теміржол қоршауының ішіне еніп кететінін айтып отыр. Ал жолшылар машинистерден, станция кезекшілері немесе жол диспетчерінен жол бойында мал жүргені туралы хабарды алған бойда сол жерге асығады екен. «Теміржолшылар адамдардан арлы-берлі өтуге арналған өтпелерді жауып жүруді және мал иелерінен малды қараусыз, бағусыз қалдырмауды сұрап, түсіндіру жұмыстарын тұрақты жүргізіп келеді. Соған қарамастан, нәтиже шамалы. Жыл басталған бес ай ішінде мал басу оқиғасы 9 рет тіркеліп және бұл көрсеткіш өткен жылмен салыстырғанда бірнеше оқиғаға артқан. Ең сорақысы, адамдардың пойыз астына түсіп қалу оқиғаларының да жиілеуі алаңдатып отыр. «Сақтықта қорлық жоқ» деген, теміржолдан ары-беру өтуге тек белгіленген жерлерден ғана өтіп, қауіпсіздік ережесін сақтап жүрсе, қайғылы жағдайлар орын алмас еді ғой» дейді Арыс жол дистанциясы өндірістік-техникалық бөлімінің бастығы Бақытжан Сарыпбеков.

Бөгде адамдардың теміржол бойында жүруі салдарынан биылғы жылы 2 рет жедел тежеу орын алса, соңғы бес жылда адам басу оқиғасы 8 рет тіркелген...