Еліміздің логистикалық әлеуеті Қазандағы саммитте баяндалды
«Қазақстан теміржолшысы» газетінің тілшісі
«KTZ Express» АҚ өкілдері «Казань Экспо» халықаралық көрме орталығында өткен «Ресей – Ислам әлемі: KazanSummit 2022» XIII Халықаралық экономикалық саммитіне қатысты.
Дәстүрлі саммитке биыл әлемнің 72 елінен және Ресейдің 38 өңірінен 5000-ға жуық адам қатысты. Іскерлік бағдарламаның негізгі тақырыбы бірлесе пайдалану экономикасы деп аталды. Іс-шара барысында «Солтүстік-Оңтүстік» клубы отырысы кезінде «KTZ Express» АҚ бас директорының орынбасары Бақыт Успаев қатысушыларға Қазақстанның логистикалық әлеуетін, еліміздің аумағы арқылы өтетін бағдарлардың артықшылығы туралы айтып берді. Ол сондай-ақ аталған компания Қазақстан арқылы өтетін бағдарлар бойынша клиенттерді өзара іс-қимыл және кешенді сервиспен қамтамасыз ете отырып, жүк ағынын қабылдау және қызмет көрсету үшін барлық жағдай жасалатынын жеткізді. Халықаралық шара барысында қатысушы елдер «Солтүстік-Оңтүстік» көлік дәлізінің Үлкен Еуразия экспорттық логистикасы мен экономикасын дамытудағы интеграциялық рөлі, Ресей азық-түлік өнімдерін Қазақстан, Өзбекстан, Иран, Таяу Шығыс және Қытай елдеріне жеткізу бойынша сервис және басқа да бірлескен жобалардың жүзеге асыру барысы туралы сөз болды.