Шымкетте теміржолдағы экология мәселесі көтерілді

5 маусым – Бүкіләлемдік экологтар күніне орай Шымкент ЖТ бөлімшесінде экологиялық және радиациялық қауіпсіздікке арналған республикалық семинар өтті. Шара мақсаты – жаңа ҚР Экологиялық кодексінің талаптары мен нормаларын түсіндіру.

Бөлімше директоры Амангелді Арысбаев жетекшілік еткен басқосуда қоршаған ортаны қорғау саласындағы, ҚР Экологиялық жаңа кодексінің енгізілуіне байланысты экологиялық нормалау, радиациялық қызмет жұмысын ұйымдастыру мәселелері талқыланды. Маңызды семинарға астанадан арнайы барған «ҚТЖ» ҰК» АҚ Техникалық саясат департаментінің бас менеджері Сағат Қабиев, «ҚТЖ» ҰК» АҚ мен оның еншілес ұйымдарының 2060 жылға дейінгі төмен көміртекті даму бағдарламасы» туралы баяндама жасап, scope 1, scope 2, scope 3 парниктік газдарды шығару есебінің әдістемесін түсіндірді. 

– Еліміздегі көптеген салаларға және көліктің басқа түрлеріне қарағанда, теміржол көлігі анағұрлым экологиялық таза болып саналады. Халықаралық теміржол одағының деректеріне сүйенсек, теміржол көлігінен бөлінетін парниктік газдар үлесі АҚШ пен Еуразиялық одақ экономикасында 2,4 және 2,9 пайызды құрайды. Жылжымалы құрамдар бойынша парниктік газдардың тікелей бөліну көздеріне тепловоз, дрезина, автокөліктер жатады. Компанияда осы газды бөлудің негізгі көзіне пойыздар тартатын локомотивтер кіреді. Тепловоздардың инвентарлық паркінде былтырғы есеп бойынша 1285,5 локомотив болды, соның 555,5-і магистральдық тепловоз болса, 730,5-і маневрлік локомотив. Парктегі электровоздар саны – 559 бірлік. Сол сияқты компанияда парниктік газды бөлетін 4258 стационарлық көз бар, оның ішінде газ қолданылатыны 70, дизель отынымен жұмыс істейтіні – 25, көмір қолданылатыны – 174, электр энергиясымен істейтіні – 976 және пеш жағылатын 3013 ғимарат бар, – деді Сағат Қабиев. 

Сонымен қатар ол болашақта Қазақстан теміржолы компаниясының осы бағыттағы жұмыстарымен бөлісті. Соның ішінде қазір сынақ кезеңінен өтіп жатқан жаңа технологияларды қолдану, көміртек бейтарапты энергия ресурстар қолдану арқылы темір жол желілерін электрлендіру, жаңартылған энергия көздерін қолдана отырып ғимараттар мен құрылыстарға күрделі жөндеу жүргізу және тағы басқа жаңашылдықтар болатынын жеткізді. 

Семинарда компанияның Еңбек және экология қауіпсіздігі бойынша инспекциясының өкілі Лаура Омарова компанияның қазіргі экологиялық қауіпсіздік жағдайына тоқталып, бұл саладағы ішкі бақылау нәтижелерімен бөлісті. Сонымен қатар семинарда экология модулін «Өндірістік қауіпсіздіктің біріктірілген жүйесі» автоматтандырылған жүйесіне енгізу мәселесі де сөз болды. Семей ЖТ бөлімшесінің экологы Ерлан Салиев ҚР Экологиялық кодексінің экологиялық шығын, ремедиация және ремедиация бағдарламасын әзірлеу мәселелеріне қатысты талаптарын түсіндірді. 

«Біз семинар барысында жұмысымызға тікелей қатысы бар мол мағлұмат алдық. Пікір алмасып, тәжірибе бөлістік. Мұндай іс-шаралардың ұйымдастырылуы білім-біліктілігімізді арттыруда маңызы зор», – деп өз пікірін білдірді Шымкент ЖТ бөлімшесінің қоршаған ортаны қорғау инженері Хамит Сматов.