Теміржолдағы адал еңбек иесіне құрмет көрсетілді

Қызылорда магистральдық желі бөлімшесінің ұжымы Қызылорда мемлекеттік емес өртке қарсы қызметінің инспекторы Жандарбек Өтегеновті асқаралы алпыс жасқа толуымен құттықтады.

Жандарбек Сиятұлының есімі аймақ теміржолшыларына жақсы таныс. Өйткені ол – өмірін ел экономикасының күретамырына айналған саламен байланыстырған азамат. Темір жолды өз тағдырының бір бөлшегіне балаған жанның өмір жолы – адалдық пен еңбекқорлықтың көрінісі.  

Өтегеновтер – танымал теміржолшылар әулеті. Сондықтан жол бойында туып-өскен баланың ата кәсібін таңдауы таңсық емес. Жандарбек Сиятұлының еңбек жолы темір жолдың түрлі буындарында өтті. Қай қызметте де өзін талапшыл, тәртіпті, іскер маман ретінде көрсетті. Бөлімше бастығының вокзал шаруашылығы жөніндегі орынбасары қызметін атқарған жылдары өңірдегі вокзалдардың қауіпсіздігі мен қызмет сапасын арттыру бағытында жүйелі жұмыстар жүргізді.  

Биылғы Республика күні қарсаңында Қызылорда магистральдық желі бөлімшесінің директоры Ербол Сәулебеков Жандарбек Өтегеновтің сол еңбегін жоғары бағалап, мерейтойлық төсбелгімен марапаттады.  

Бүгінде ол – Қызылорда мемлекеттік емес өртке қарсы қызметінің инспекторы. Аймақ теміржолының тыныштығы мен қауіпсіздігін қамтамасыз ететін маңызды құрылымда да Жандарбек Сиятұлы сенім мен жауапкершілік үдесінен шығып отыр.  

Басшылық атынан жауапты маманды 60 жылдық мерейтойымен құттықтаған бөлімше директорының орынбасары Ербол Оңғарбаев оның көп жылғы адал қызметін ерекше атап өтіп, «Алдағы уақытта ел экономикасының күретамырына айналған темір жолдағы еңбегіңіздің жемісін көріңіз» деген тілегін білдірді.