Астанада «Пойыздар қозғалысы қауіпсіздігі бойынша үздік тәжірибелер» байқауының жеңімпаздары марапатталды
Елордада «Қазақстан темір жолы» ҰК» АҚ-ның «Пойыздар қозғалысы қауіпсіздігі бойынша үздік тәжірибелер» операциялық қауіпсіздігіне қатысты үш күндік байқауы аяқталды. Іс-шараға еліміздің барлық өңірлерінен 12 команда қатысты. Олардың әрқайсысы пойыздар қозғалысының қауіпсіздігін арттыруға бағытталған жобаны ұсынды, деп хабарлайды Rail-news.kz.
Байқау қорытындысы алғаш рет дәстүрлі қазылар алқасының қатысуынсыз шығарылды: әр команда өз әріптестерінің жобаларын бағалады және жеңімпаздар алқалы түрде анықталды.
Жобалар мәселенің өзектілігі, шешімнің өзіндік ерекшелігі, экономикалық тиімділігі, өлшенетін нәтижелері және таралым мүмкіндігі бойынша бағаланды. Ұсынылған бастамалардың қатарында пульт-таблоны жаңғырту, тежеу ережелерін оқыту әдістемелерін енгізу, иесіз малдардың соқтығысуын болдырмау жүйелері, локомотив сигнализациясының жұмысын жетілдіру және станциялардың өткізу қабілетін арттыру бар.
Бірінші орынды Маңғыстау өңірінің теміржолшылар командасы, екінші орынды Ақтөбе өңірі, үшінші орынды Ақмола өңірі иеленді.
Байқау тәжірибе алмасу, жетістіктерді көрсету және теміржол қозғалысы қауіпсіздігі саласында инновациялық шешімдерді енгізу алаңына айналды.
Қауіпсіздік мәдениеті – компанияның негізгі басымдықтарының бірі, ал қызметкерлердің кәсібилігі мен жауапкершілігі — тасымалдау сенімділігінің негізі.
Байқау аясында квиз-ленд қорытындысы бойынша Шымкент өңірінің ең жедел, эрудициялы және креативті командасы анықталды.
Байқау жеңімпаздарына ақшалай сертификаттар табысталды.
Әрбір қатысушыға қатысу сертификаты, ал белсенді қатысушыларға mini — MBA бағдарламасы бойынша одан әрі оқытуға арналған жекелеген бағыттар берілді.