Ақтауда пойыыздағы жолаушының жоғалған заты табылды
Маңғыстау облысы бойынша меншікті тілші
Ақтау қаласына пойызбен жолға шыққан алматылық тұрғын бар құжаты мен ақшасы, телефоны салынған қол сөмкесін жоғалтып алып, қапелімде ғаріптің күйін кешті. Абырой болғанда желілік полиция өкілдері көмекке келіп, жоғын тауып берді.
Аталған жағдай 11 маусым күні Алматы-Маңғыстау пойызында орын алды. Пойызбен оңтүстік астанадан Маңғыстауға келе жатқан Дариға Шатқұлова Сай-Өтес станциясына аялдаған кезде перронға түседі. Ішке кірген соң өзімен бірге алып түскен қол сөмкесінің жоқ екенін байқайды. Пойыз қозғалып кетпей тұрып сөмкесін табу үшін жан жаққа жүгіріп шыр-пыр болған әйелдің бағына дәл сол пойыз тоқтаған тұста желілік полиция бөлімшесі орналасқан еді.
– Ақтауға тойға бара жатыр едік. Пойыз Сай- Өтес станциясына аялдаған кезде түсіп перрондағы сатушылардан сауда жасадым. Асығып, пойыздан қалып қоймайық деп немерелеріммен арпалысып жүргенде сөмкемді қайда қалдырғанымды білмей қалдым. Бір жақсысы сол жерде желілік полиция қызметі бар екен. Жүгіріп соларға бардым. Желілік полиция қызметкерлері, әп-сәтте сөмкемді тауып берді. Ішіндегі нәрселері түгел. Оларға алғысым шексіз. Халықтың ризашылығына бөленіп, еңбегінің жемісін көре берсін! – дейді Дариға Шатқұлова.
Бұл Сай-Өтес станциясында жолаушылар арасында кездескен бірінші жағдай емес екен. Станциядағы желілік полиция өкілдеріне биылдың өзінде біреу ұялы телефонын, енді бірі әмиянын, тағы біреуі жүгін жоғалтып жүгінгендер аз болмаған. Ал Дариға Шатқұлованың сөмкесі өзге вагоннан табылған. «Ол кісі қателесіп басқа вагонға мініп, дәл өзінікіндей орынға сөмкесін тастап кеткен екен», – дейді Сай- Өтес станциясындағы желілік полиция бөлімшесінің басшысы Нұрлыбек Рахметов.