Қазақстанда шектеулер енгізілуі мүмкін
«Қазақстан теміржолшысы» газетінің тілшісі
Елімізде коровирус індетінің қайтадан өршу қаупі байқалады деп дабыл қағуда санитарлық дәрігерлер. Осыған орай Қазақстан «сары» аймаққа өткен жағдайда енгізілетін жаңа шектеулер тізімі бекітілді.
Елдегі COVID-19 көрсеткіштерінің артуын ескере отырып, Қазақстан аумағында коронавирус инфекциясының таралуына жол бермеу жөніндегі ведомствоаралық комиссия өңірлер эпидемиологиялық қауіп-қатердің «сары» аймағына көшкен жағдайда қосымша шаралар қабылдамақ.
Денсаулық сақтау министрі Ажар Ғиният өз сөзінде елімізде маусымның ортасынан бастап коронавирус инфекциясын жұқтырғандар саны артқанын атап өтті. Мәселен, өткен аптамен салыстырғанда жұқтыру жағдайлары 2,9 есе артқан, науқастардың 80 пайызына жуығы – індетке қарсы екпе алмағандар және соңғы екпеден кейін 6 ай өтіп кеткен адамдар.
Сонымен ел өңірлері «сары» аймаққа өтер болса, алдымен науқаспен тығыз қарым-қатынаста болғандарды қашықтан жұмыс істеу форматына көшіреді. Екіншіден, COVID-19-ға қарсы екпе салдыруға болмайтын қызметкерлер мен жүкті әйелдер қашықтан жұмыс істеу форматына ауыстырылады. Үшіншіден, жабық жерлер мен қоғамдық көлікте міндетті түрде маска тағу керек болады. Сонымен қатар 10-нан аса адам қатысатын жиналыстарды онлайн форматта өткізу, оған қоса аймақтың эпидемиологиялық ахуалына қарамастан, әуеде, темір жол көліктері мен халықаралық автобустарда маска тағу ұсынылады.