Қазақстан еуропалық стандарт бойынша вагондар шығару үшін швейцариялық компанияны тартпақ

ҚР Индустрия және инфрақұрылымдық даму министрлігі елімізде еуропалық стандарттар бойынша жеңіл вагондар шығаруды ұйымдастыру үшін швейцариялық Stadler Rail компаниясын тарту мәселесін қарастыруда. Бұл туралы Орталық коммуникациялар қызметі алаңында Көлік комитеті төрағасының міндетін атқарушы Қасым Тілепов айтты, деп хабарлайды Rail-news.kz.

Көлік комитеті төрағасының міндетін атқарушы Қасым Тілепов теміржол көлігі арқылы жолаушылар тасымалын ұйымдастыру мәселесіне қатысты ахуалды былай деп сипаттады:

– Бүгінде Қазақстан аумағында 130-дан астам жолаушылар пойызы қызмет көрсетеді. Жылжымалы құрам паркінде 2 мың 600 жолаушы вагоны бар. Вагондардың орташа тозу деңгейі 46 пайызды құрайды. Соңғы 10 жылда 1 мың 100 жаңа вагон, оның ішінде 600-ге жуық «Тұлпар-Тальго» вагоны сатып алынды. Биылғы жылы тағы 73 вагон сатып алынбақ, – деді ведомство өкілі.

Ол сондай-ақ, 900-ден астам вагонның пайдалану мерзімі 30 жылдан асып кеткенін және мұндай тозығы жеткен вагондар сұраныстың өсуі кезінде, әсіресе, жаз айларында пойыздарға тіркелетінін атап өтті. Бұл түйткілді мәселенің түйінін тарқату үшін министрлік еуропалық технология бойынша отандық жолаушылар вагоны өндірісін ұйымдастыруға мүдделілік танытып отырғаны белгілі болды.

«Бизнесті, атап айтқанда, жолаушылар паркін жаңарту бойынша тасымалдаушыларды қолдау және ынталандыру мақсатында жолаушылар тасымалын субсидиялау, жолаушылар вагондарын сатып алу кезінде сыйақы мөлшерлемелерін беру бойынша шаралар қабылдануда. Сондай-ақ, елордада еуропалық стандарттар бойынша жолаушылар вагондарын өндіруді ұйымдастыру үшін швейцариялық «Штадлер» компаниясын тарту мәселесі пысықталуда. Осы компаниямен бірлесіп 537 жаңа вагон шығару көзделіп отыр», – деді Қасым Тілепов.