Көмір тасымалы үшін жеңілдетілген тариф енгізбек
«Қазақстан теміржолшысы» газетінің тілшісі
Эстониялық Eesti Raudtee компаниясы Қазақстаннан жеткізілетін көмір тасымалы үшін жеңілдетілген тариф енгізбек. Бұл туралы эстониялық Err.ee басылымы жазды.
Бұл жоспар сәтті жүзеге асар болса, Эстония темір жолы мен порты арқылы Қазақстаннан айына 30-50 мың тонна көмір тасымалданады. Биыл маусым айында Operail мемлекеттік теміржол тасымалдаушысы Eesti Raudtee жекеменшік кәсіпорнына көмір тасымалы үшін қосымша жеңілдіктер енгізу туралы өтінішпен шыққан еді. Әлі күнге дейін Ресей мен Қазақстаннан жететін көмір тасымалының транзиті Латвия арқылы өтуде.
Алайда соңғы кездері көмір транзитінің көлемі айтарлықтай азайды. Operai Қазақстан көмірін Эстония арқылы тасымалдау туралы келіссөздер жүргізуде. Eesti Raudtee бағасы жағынан Латвия темір жолымен бәсекеге түседі, олардың тасымалы тоннасына 6-7 еуро құрайды. Operail мемлекеттік тасымалдаушы Eesti Raudtee компаниясына көмір тасығанда инфрақұрылымды қолдану ақысын тоннасы үшін әдеттегі 2,2 еуродан 1,1 еуроға дейін төмендету туралы өтінішпен шықты. Eesti Raudtee бұл ұсынысты қабыл алды. Eesti Raudtee бағалауы бойынша Қазақстан көмірінің транзиті теміржол компаниясының табысын арттыруы мүмкін. Жеңілдік жарты жылға қарастырылған.