Үздік вагон қараушылар анықталды

Үстіміздегі жылдың 29 шілдесі күні Астана вагон пайдалану депосында «Кәсібі бойынша үздік» байқауы өтті. Вагон қараушылар арасында өткен дәстүрлі сайысқа жиырмадан астам маман қатысып, үздіктер анықталды.

– Бұл байқаудың мақсаты – жұмысшылардың білім деңгейін көтеруге деген белсенділігін арттыру, вагоншылардың логикалық ойлау жүйесін кеңейтіп, жауапкершілікті сезінуге, зейінді болуға, ұжымда жұмыс істей білуге тәрбиелеу. Яғни, бұл сайыс – адамның дамуына, оның дағдыларын жетілдіруге күшті ынталандыру болып табылатын конкурстық бағдарламалар бойынша жарыс, – дейді Астана вагон пайдалану депосының өндірістік оқыту жөніндегі шебері Азамат Қабиев. 

Байқау қатысушыларға жарыстың шарттарын және қауіпсіздік ережелерін таныстырған нұсқаулықтан басталды. Жарыс үш кезеңді қамтыды. Бірінші кезең вагон қараушылар күнделікті жұмыс барысында орындайтын қызметтік міндеттерін қамтыған, 20 сұрақтан тұратын теориялық білім тестілеріне белгілі бір уақыт шегінде жауап беруі тиіс. Тест жауаптары балдық жүйемен бағаланды. Мәселен, 15-20 дұрыс жауапқа – 5 балл, 10-15 дұрыс жауапқа – 3 балл, 5-10 дұрыс жауапқа 1 балл белгіленді. Екінші кезеңде қатысушылар автотіркеме механизмін бөлшектеп және қайта жинауы қажет болды. Бұл шарт бойынша сапа мен жылдамдыққа, яғни уақытқа басымдық берілді. Кім сапалы және жылдам жинайтын болса, соның асығы алшысынан түседі. Мәселен, автотіркемені шашып қайта жинауға 30-35 секунд жұмсаған адамға ең жоғары 5 балл берілсе, ең төменгі 51 және одан көп уақыт жұмсағандарға 1 балл қарастырылған екен. Үшінші кезеңде қатысушылар вагондағы ақаулықты тез тауып, кәсіби біліктіліктерін көрсетуі шарт болды. Және кім аз уақытта көп ақау тапса, жеңіске бір табан жақындай түспек. Әрбір анықталған ақауға 1 балдан берілді. 

Сонымен жарыстың аты жарыс, шын мәнінде кәсібі бойынша нағыз үздіктерді анықтаған сайыста бірінші орынды Ғазиз Мұхамеджанов, екінші орынды Алтынбек Кемелов жеңіп алса, үшінші орынды Төребай Жеңісбек еншіледі. Ал теориялық білім бойынша жиырма сұраққа да дұрыс жауап берген Жұматай Сахариев «Теориялық білім бойынша үздік» деп танылды. Автотіркеме құрылғысын шашып, қайта жинауда көз ілеспес шапшаңдығымен (20 секунд) және сапалы жұмысымен Сәкен Жұмабай топ жарып, «Автотір- кемені бөлшектеп және жинау бойынша үздік» деп танылды. Байқау жеңімпаздары депо басшылығы мен кәсіподақ комитеті тарапынан ақшалай және бағалы сыйлықтармен марапатталды.