ҚТЖ басшысы теміржолшыларды кәсіби мерекелерімен құттықтады
ҚҰРМЕТТІ ТЕМІРЖОЛШЫЛАР! ҚАДІРЛІ САЛА АРДАГЕРЛЕРІ!
Сіздерді Көлік қызметкерлері күнімен шын жүректен құттықтаймын! Теміржолшылар үшін тамыздың алғашқы аптасында аталып өтуі дәстүрге айналған төл мерекелеріңіз сіздерге көтеріңкі көңіл-күй мен құт-береке сыйласын.
Еліміздің жүк және жолаушы тасымалының басым бөлігін қамтамасыз етіп отырған теміржолшылар еңбегі қашан да айрықша құрметке ие. Мәртебелі мамандық иелерінің жасампаз еңбегі ғасырдан асатын тарихы бар отандық темір жол көлігінің шежіресіне алтын әріппен жазылған.
Биылғы жылы аталып отырған «Қазақстан темір жолы» ұлттық компаниясының 25 жылдығында қол жеткізген жетістіктер сол аға буынның даңқты еңбек жолын лайықты жалғастырып отырған бүгінгі теміржолшылар еңбегінің нәтижесі екені де айқын.
Бүгінгі таңда ел экономикасын алға сүйреген локомотив деген атқа лайық, еліміздегі ең ірі ұлттық компанияда еңбек ететін жүз мыңнан астам теміржол қызметкерлеріне салаға сіңірген адал еңбегі мен қозғалыс қауіпсіздігін қамтамасыз етудегі жауапкершілігі, ерлікпен пара-пар қайраты мен қаһармандығы үшін шын жүректен алғысымды білдіре отырып, отбасыларына амандық пен саулық, еңбек жемісі мен толағай табыс тілеймін.
Құрметпен,
Нұрлан САУРАНБАЕВ,
«ҚТЖ» ҰК» АҚ Басқарма төрағасы