«Жәрдем» және «Саламатты Қазақстан» медпойыздары 60 мың адамды қамтымақ
Ақтөбе облысы бойынша меншікті тілші
«Жәрдем» және «Саламатты Қазақстан» арнайы мамандандырылған медициналық пойыздары сапарға шыққан екі айдан астам уақыт ішінде 20 мыңнан астам адамды қабылдап үлгерген.
«Жәрдем» мамандандырылған медициналық пойызы шамамен 16 000 адамды қабылдап, қызмет көрсеткен. Оның ішінде 6 мыңға жуығы – бала. Дәл қазір пойыз Батыс Қазақстан облысының шалғай станцияларын аралап жүр.
Ал «Саламатты Қазақстан» пойызы шамамен 4500 адам қабылдаған. Оның ішінде 600-ге жуығы – бала. Бүгінде Павлодар облысында қызметін жалғастырып жатыр. Облыстың 9 станциясына аялдаған консультациялық-диагностикалық пойыз дәрігерлері 857 тұрғынды, оның ішінде 104 баланы тексеруден өткізіп, қажетті қызмет көрсеткен.
Консультативтік-диагностикалық пойыздың дәрігері Сәкен Кәкеновтің айтуынша, облыстың шалғай ауылдарының тұрғындары арасында жиі кездесетін аурулар: аралас астигматизм, артрит, артроз, жүректің ишемиялық ауруы, созылмалы бронхит, артериялық гипертензия. Сондай-ақ, жобаға екінші рет қатысып отырған дәрігер шалғай ауылдардың тұрғындарына мамандар берген кеңестерді ұстануға, тағайындалған препараттарды қабылдауға кеңес беретінін атап өтті.
«Саламатты Қазақстан» медициналық пойызы 2022 жылдың соңына дейін еліміздің 67 шалғай станциясына барады деп күтілуде. Пойыз бағыты Қазақстанның 10 облысын қамтиды. Ал «Жәрдем» медициналық пойызы Батыс Қазақстан облысында 9 тамызға дейін болады. Қос пойыз биылғы маусымда жалпы саны 60 000 адамды қамтып, медициналық қызмет көрсетеді деп күтілуде.