Жолаушыларға үндеу жасады
ҚР Индустиря және даму министрлігінің көлік комитеті теміржол қызметін пайдаланатын жолаушыларға үндеу жасады. Биылғы жазда жолаушылар тасымалы өсіп, теміржол көлігіне сұраныстың артуына байланысты салада көрсетілетін қызметтердің сапасы да өзекті болып отыр.
Жаз маусымында, әрине, ертерек қам жасағандар болмаса пойызға билет табу қиынға айналады. Кассада жоқ билет алыпсатарлар қолынан табылып жатады... Министрлікке осы мәселеге байланысты шағымдар көбейген.
Көлік комитетінің тапсырмасымен алыпсатарлық фактілерінің жолын кесу мақсатында аумақтық бөлімшелер Көлік полициясы мен Мемлекеттік кіріс департаменті өкілдерімен бірлесіп вокзалдарда рейд жүргізуде. Осы жылдың басынан бері «Жолаушылар тасымалы» АҚ 11 миллионнан астам билет сатқан, оның ішінде онлайн сату үлесі 70%-ды құрады. Электрондық билеттерді сатудың ұлттық жүйесіне көшумен 15 интернет-сайт, 30 мыңға жуық өзіне-өзі қызмет көрсету автоматтары, пошта бөлімшелері арқылы сатуды ұйымдастыру жолымен өткізу арналары кеңейтілді, сондай-ақ билеттерді қайта сату бойынша олқылықтарды болдырмау мақсатында 2019 жылдан бастап орындарды «ұстап алу» мүмкіндігі жойылып, электрондық «күту парағы» қызметі және орынды брондау фактісін растау бойынша SMS-хабарламалар жүйесі енгізілді. Қайтару кезінде билет жүйеге түсіп, автоматты түрде алдымен «күту парағына» жіберіледі, яғни тапсырылған билетті бірден сатып алу мүмкін емес. Ал күту тізіміне кезек адами факторсыз автоматты түрде жасалады. Теміржол билеттерін сатудың заманауи электрондық жүйесі авторизацияланған пайдаланушыларға басқа жолаушыға билеттерді қайта ресімдеуге мүмкіндік бермейді. Биыл 6 айда күту парағын 196 494 адам пайдаланған, ал өткен жылғы сәйкес кезеңде оны 77 728 адам пайдаланған еді.
Осы ретте көлік комитеті жолаушыларды билеттерді сатып алу кезінде кездейсоқ адамдардың күмәнді қызметін пайдаланбауға, ал билеттерді заңсыз қайта сату фактілері, яғни алыпсатарларды анықтау кезінде азаматтық ұстаным танытып, құқық қорғау органдарына жүгінуге шақырады. 2020 жылдың қаңтар айынан бастап билеттерді қайта сату үшін әкімшілік жауапкершілік күшейтілді, айыппұл сомасы 100-ден 500 АЕК-ке дейін ұлғайтылды. Жыл басынан бері көлік комитетінің аумақтық бөлімшелері 300 жолаушылар пойызын тексеріп, 700-ге жуық заң бұзушылықты анықтаған. «Құрметті жолаушылар, теміржол көлігі саласындағы заң бұзушылықтар бойынша ҚР ИИДМ Көлік комитеті Ахуалдық орталығының 98-35-35 сенім телефонына және Whatsapp мессенджеріне +77080880800 хабарласуыңызға болады» делінген үндеуде.