Маңғыстауда биыл темір жол бойының 160 шақырымы қоршалады

Биыл Маңғыстау магистральдық желі бөлімшесіне қарасты темір жолдың 160 шақырымына мал өтпес үшін қоршау салу жоспарланған. Бүгінге дейін соның жартысы орындалып, яғни 80 шақырымда жаңа қоршау бой көтерді. Онымен қоса ескілері де ретке келтіріліп, бұзылған, сынған жерлерін жөндеу жұмыстары жалғасуда.

  Маңғыстау магистральдық желі бөлімшесі жол бөлімінің жетекші инженері Ерлан Аманжолов қоршау құрылыстары үшін 16 адам уақытша жұмысқа қабылданғанын, барлық жұмысты бүгінде солар жасап жатқанын жеткізді.

– №3-Үстірт-№5 бекет, №7 бекет-Сай-Өтес станциясы, АлтайТеректі және №14-15 бекеттердің аралықтарында жаңа қоршаулар салынды. Одан бөлек бұрынғы қоршаулардың да үзілген сымдарын жалғап, сынған ағаштарын ауыстырып жатырмыз. Биыл 20 шақырым қоршауды жөндеуді межелеген едік. Бүгінге дейін 19 шақырымын жаңарттық. Ол Бейнеу жол дистанциясы бойынша Бейнеу–№1 бекет, Үстірт–№5 бекет, Маңғыстау жол дистанциясы аумағында №10 бекет–Маната, №11-12 бекет, №12-13, №13 бекет–Шетпе аралықтары. Енді осынша жұмыстан соң жолға мал шығуы азаяр деген ойдамыз. Қоршаудың бұған  септігі көп, – дейді ол. 

Әрине, қоршаулар көбейген сайын мал басу деректері де кеми түсетіні анық. Мәселен, Маңғыстау жол дистанциясы бойынша былтырғыдан жағдай біршама тәуір. Өткен жылы жеті айда тепловоз машинистері малға қатысты 137 рет шұғыл тежегішті іске қосса, биыл 94 рет тежеу беріпті. Ол өз кезегінде қауіпсіздіктің сақталуына, уақыттың үнемделуіне әсер етіп, жанармай шығынын 6,85 тоннадан 4,70 тоннаға қысқартқан. 

– Биыл да мал шығыны аз емес, дистанция жолдарында 15 мал пойыздың астына түсті. Айтуға оңай болғанмен, оның артында қаншама кері салдар жатыр. Дей тұрғанмен, фактінің 2021 жылдың тиісті кезеңіндегіден әлдеқайда төмендегені көңілге демеу. Аталған 15 оқиғаның тек біреуінде мал иесі табылмады. Қалғандарының иесі анықталып, оларға ҚР Әкімшілік құқық бұзушылық туралы Кодексінің 559-бабына сәйкес шара қолданылды. Әрине, алдағы уақытта   біз жағдайды бүгінгіден де жақсартуға күш салудамыз. Осыған дейін желілік полиция бөлімшесі және ауыл әкімдігінің қызметкерлерімен бірлесе теміржолға жақын Шетпе, Аусары, Қосбұлақ, Р бекеті–Боржақты аралығы, Жармыш, Қызылтөбе, Батыр, Баянды ауыл тұрғындары мен шаруа қожалықтарының иелерін аралап, әңгімелесіп, түсінік жұмыстарын жүргіздік. Қарақия және Мұнайлы ауданы әкімдеріне мал бағуға бақташы жалдау туралы 12 мәрте хат жолдадық. Ал малға қоршаулар жайына келсек, аймақта салынатын барлығы 160 шақырымның 70 шақырымы біздің дистанцияға тиесілі. Қазір сол жұмыстардың қарекетіндеміз, – дейді Маңғыстау жол дистанциясының жетекші инженері Ержан Артықбаев.