Қазақстан АӨСШК елдеріне жаһандық көлік-транзит дәліздерін қалыптастыруды ұсынды
Бұл туралы Астанадағы Азиядағы өзара іс-қимыл және сенім шаралары кеңесінің саммитінде Қазақстан Президенті Қасым-Жомарт Тоқаев айтты, деп хабарлайды Rail-news.kz.
Президент Қазақстанның алдағы екіжылдық төрағалығы кезінде өзіне маңызды міндеттер алып отыр және Кеңеске мүше мемлекеттердің тығыз ынтымақтастығы мен қолдауына сенім артатынын атап өтті.
«Біріншіден, экономикалық өлшем. Өзара тұрақты байланыс жөніндегі АӨСШК Кеңесін құру дер кезінде қабылданған шешім деп санаймын. Жаһандық логистикалық тізбектердің үзілуі тиімді көлік-транзит дәліздерін қалыптастыруға жаңа көзқараспен қарауды талап етеді», - деді Қасым-Жомарт Тоқаев.
Осы орайда Президент жүк тасымалының оңтайлы әрі қолжетімді жолдары экономикамыздың тұрақты өсімінің маңызды факторы болып отырғанын жеткізді.