Президент көлік және транзит саласындағы маңызды қадамдарды атады
«Қазақстан теміржолшысы» газетінің тілшісі
Елордада өткен «Орталық Азия – Ресей» саммитінде Қазақстан Президенті Қасым-Жомарт Тоқаев Орталық Азияда көлік инфрақұрылымын дамыту мәселесін көтеріп, көлік және транзит саласындағы маңызды қадамдарды атады.
Мемлекет басшысы дәстүрлі логистикалық тізбектердегі іркілістерді айта келе, бұл жағдай өңір елдеріне көліктік-транзиттік әлеуетті толық пайдалануды талап етіп отырғанын айтты.
– Географиялық орналасуына байланысты Орталық Азия әлемдегі ең ірі нарықтар арасындағы маңызды буын болып отыр. Сондықтан қазіргі кезеңде күш-жігерімізді қолданыстағы және келешегі бар көліктік-транзиттік бағыттарды дамытуға жұмылдыру маңызды. Дүниежүзілік банктің бағалауына қарағанда, Орталық Азиядағы көлік коммуникацияларының дамуы барлық елдің жалпы ішкі өнімінің 15%-ке өсуін қамтамасыз ете алады, – деді Қасым-Жомарт Тоқаев.
Президент саладағы кемшіліктерді жою үшін инфрақұрылымды жаңғырту, әкімшілік рәсімдерді жеңілдету, транзит үшін қолайлы жағдай жасау, сонымен қатар, біріктірілген цифрлық логистикалық шешімдерді енгізу маңызды екенін атап өтті.
Сондай-ақ, Орталық Азия елдері мен Ресейді бірлескен инфрақұрылымдық жобаларды жүзеге асыруға шақырып, Транскаспий халықаралық көлік бағдарын дамытуға тың серпін беріліп отырғанын атап өтті.
– Перспективалы Солтүстік-Оңтүстік дәлізін одан әрі қарай дамытуға ерекше назар аудару керек. Шығыс Азиядан Парсы шығанағы елдеріне ең қысқа жол ашатын Қазақстан-Түркіменстан-Иран теміржолының әлеуетін барынша тиімді пайдалануға болады, – деді Мемлекет басшысы.