Қазақстан мен ЕО елдері көлік дәлізін кеңейтуді көздеп отыр
«Қазақстан теміржолшысы» газетінің тілшісі
Кеше Ақордада Мемлекет басшысы Қасым-Жомарт Тоқаевтың Еуропалық кеңес президенті Шарль Мишельмен кездесуінде энергетика, жасыл экономика, ауыл шаруашылығы, көлік және логистика салаларындағы ықпалдастық мәселелері сөз болды.
Қ.Тоқаев пен Ш.Мишель өндіріс пен жеткізудің жаһандық тізбектерін қамтамасыз ету үшін Еуропа мен Орталық Азия арасындағы қолданыстағы халықаралық көлік дәліздерін кеңейтудің және жаңа дәліздерді дамытудың маңыздылығын баса айтты. Олар сондай-ақ Транскаспий халықаралық көлік бағдарының әлеуетін, оны одан әрі дамыту нұсқалары мен өңірдегі басқа көлік бағдарларының рөлін талқылады.
– Халықаралық көлік дәліздерін дамытудың маңыздылығын атап өттік. Бұл – қазіргі геосаяси жағдайда өте өзекті мәселелердің бірі. Сондай-ақ Еуропалық одақтың Транскаспий халықаралық көлік бағытын қолдау мүмкіндігін қарастырдық. Бұдан бөлек, Еуропа санкцияларының Қазақстан экономикасына ықпалын болдырмау мәселесін талқыладық, – деді Қ. Тоқаев.
Кездесу барысында биылғы 8 айда Қазақстан мен Еуропалық одақ елдері арасындағы тауар айналымы 43 пайызға артқаны атап өтілді. Қазіргі таңда Еуропалық одақ – Қазақстанның ең ірі сауда және инвестициялық серіктестерінің бірі. 30 жыл ішінде Қазақстанға Еуропадан тартылған инвестиция көлемі 160 млрд доллардан асқан.