Транскаспий дәлізінің рөлі артып келеді
«Қазақстан теміржолшысы» газетінің тілшісі
Үкімет басшысы бейнеконференциялық байланыс режимінде өткен Шанхай Ынтымақтастығы ұйымына мүше мемлекеттердің үкімет басшылары кеңесінің кезекті отырысына қатысты.
Онлайн отырыста Әлихан Смайылов күш-жігерді біріктіріп, перспективасы бар көлік-транзит дәліздерін дамытуға шақырды.
– Ақтау портының «Үндістан – Парсы шығанағы елдері – Иран – Қазақстан – Ресей» бағытындағы торапқа айналуға әлеуеті зор. Қазіргі жағдайда Транскаспий көлік дәлізінің Еуропа, Орталық Азия және Қытай арасындағы транзиттік ағындарды қамтамасыз етудегі рөлі де артып келеді. Осы бағыттың мүмкіндіктерін бірлесіп іске асыру жүктердің тұрақты көлемінің болуы мен үздіксіз тасымал көлемін қамтамасыз етеді, – деді ол өз сөзінде.
Сонымен қатар ол Қазақстан мен ШЫҰ елдері арасындағы тауар айналымы 22 пайызға өсіп, 51$ млрд болғанын жеткізді. Пандемия мен басқа да сын-қатерлерге қарамастан, ШЫҰ кеңістігінде дамудың айтарлықтай жоғары қарқыны сақталып отыр. Мәселен, өткен жылдың қорытындысы бойынша ұйымға мүше мемлекеттердің экономикалық өсу қарқыны 4-тен 9%-ке дейін ұлғайды.