Болашағы зор жоба

Қазақстандық жүк жөнелтушілерге контейнерлік тасымалдарды Солтүстік – Оңтүстік дәлізі бойынша ұйымдастыру мүмкіндіктері ұсынылды. Бұл туралы ҚТЖ-да өткен Қазақстан мен Иран теміржол әкімшіліктері және қазақстандық бизнес өкілдері қатысқан дөңгелек үстелде сөз болды.  

Дөңгелек үстелде Иран теміржол әкімшілігі қатысушыларға сапалы сервис, бәсекеге қабілетті тарифтік шарттар және Иран арқылы құрлық дәлізімен маршруттық жылдамдықты арттыру бойынша бастамаларын ұсынды. Айта кету керек, Иран бағытының келешегі зор. Бүгінгі таңда Қазақстан мен Иранның теміржол әкімшіліктері өзара транзиттік-көліктік қарым-қатынас саласында үлкен жұмыс атқарды, сонымен бірге одан әрі даму үшін зор әлеует сақталып отыр.  

Бүгінде аталған дәлізді дамыту үшін бірыңғай мультимодальды оператор құруға бастама көтерілуде. Бұл өз кезегінде басқарудың бірыңғай жүйесін құрып, кешенді қызметті ұсынуға, икемді баға қалыптастыру және теңіз фрахтымен салыстырғанда бәсекеге қабілетті мөлшерлеме құруға мүмкіндік береді. Сонымен қатар бұл инвестициялық тәуекелдерді азайтуды және осы дәлізге қатысушы елдердің мақсат-мүдделерін біріктіруді қамтамасыз етеді. Осы орайда Қазақстан тарапы ынтымақтастыққа және бірлескен жобаларға қатысу бойынша ұсынымдарды қарастыруға дайын.