Қонысбек Дәулетияров «Құрметті энергетик» атанды
Қызылорда облысы бойынша меншікті тілші
Қызылорда магистральдық желі бөлімшесіне қарасты Қызылорда электрмен жабдықтау дистанциясында энергетиктер күніне орай салтанатты жиын өтіп, үздіктер марапатталды.
Қызылорда магистральдық желі бөлімшесі директорының орынбасары Нұрлан Бимұратов пен Қызылорда электрмен жабдықтау дистанциясының бас инженері Әлім Төлегенов әріптестерін төл мерекемен құттықтап, қауіп-қатері мол қиын да күрделі кәсіп иелерінің қажырлы еңбегіне алғыс айтып, зор денсаулық пен табыс, отбасыларына амандық тіледі.
Жиынның басты жаңалығы Қызылорда электрмен жабдықтау дистанциясының аға энергодиспетчері Қонысбек Дәулетияровтің Қазақстан Электр энергетикалық қауымдастығының «Құрметті энергетик» төсбелгісімен марапатталуы болды. Теміржолшылар арасында жылына бір рет төл мерекеге сай небәрі он адамға табысталатын төсбелгінің қызылордалық электрикке берілуі, сөз жоқ, дистанция ұжымын мақтанышқа бөлеп, мерейін өсірді. Одан басқа да үлгілі қызметімен танылған электр саласының бір топ мамандары кәсіподақ ұйымы мен дистанция басшылығының құрмет грамотасымен марапатталды.
Айта кетейік, ҚР энергетиктер күні желтоқсан айының үшінші жексенбісінде аталып өтеді.