Темір жолдағы ұрлық пен жат діни ағымның алдын алу мәселесі көтерілді
«Қазақстан теміржолшысы» газетінің тілшісі
Көкшетау локомотив айналым депосында бөлімше басшылығы мен депо қызметкерлері, локомотив бригадаларының және ЖІІБ өкілдерінің қатысуымен кеңес өтті.
Ақмола жүк тасымалы бөлімшесінің бас инженері С.Т.Баржақсин жетекшілік еткен жиында үш маңызды мәселе күн тәртібіне шығарылды: теміржол көлігіне қатысты ұрлық-қарлықпен күрес, әлеуметтік тұрақтылықты қамтамасыз ету және деструктивті діни ағымдар мәселесі.
Теміржол көлігіндегі ұрлық, мүлікті тонауға қарсы күрес мәселесі бойынша нақты фактілерді алға тарта отырып, соның ішінде Павлодар ЖТ бөлімшесінде жанар-жағармай отынын локомотив бригадаларының ұрлағаны жөнінде Көкшетау станциясындағы желілік полиция бөлімінің криминалдық полиция бөлімшесінің бастығы, полиция майоры Ерлан Рахимов баяндап берді. Ал Желілік полиция бөлімі бастығының орынбасары Марат Сәдуақасов көліктегі құқықбұзушылықпен күрес бағытындағы профилактикалық шаралар туралы айтып, жиынға қатысушыларды заңбұзушылыққа нөлдік төзімділік танытуға, сенім телефонына хабарласып, немқұрайлық танытпауға шақырды. Сондай-ақ ол қатысушылардың түрлі сұрақтарына да жауап берді.
Ақмола ЖТ бөлімшесінің бас инженері С.Баржақсин бөлімшеге қарасты кәсіпорындардағы әлеуметтік тұрақтылық мәселесіне тоқталды. Теміржолшылардың жалақысының өткен жылғы өсу деңгейі, биылғы болжам, яғни биыл құрылымдық бөлімшелерде еңбекақы 1 наурыздан бастап өседі деп күтілуде екенін атап өтті. Сондай-ақ Ұжымдық шартқа сәйкес әлеуметтік жеңілдіктер де назардан тыс қалмады.
Жиында деструктивті діни ағымдар мәселесіне және өмірдің шынайы құндылықтарына қатысты ЦАРМО КГУ-дың дінтанушы маманы Сәния Манатова көлемді мағлұмат берді. Көрнекті бейнематериалдар көрсетіліп, отбасында балалар тәрбиесіне көңіл бөліп, олардың әлеуметтік желілерді қолдануына мән беріп, қызығушылығын арттыру бойынша бірқатар ұсыныстар айтылды.
Кеңес соңында Көкшетау айналым депосының бастығы Мұхтар Балғоженов ұйымдастырушылар мен қатысушыларға алғыс айтып, бүгінгі қозғалған мәселелердің қай-қайсысы да аса маңызды екенін жеткізді.