Гамбургте Қазақстандағы логистика мәселесі талқыланды
ҚР Сыртқы істер министрлігінің, Германия Экономикасы Шығыс комитетінің және Гамбург сауда-өнеркәсіп палатасының қолдауымен ұйымдастырылған іс-шара аясында "Орталық Азияның өсу аймағы – Қазақстандағы логистика, энергетика және өнеркәсіп" тақырыбында Қазақстан-Гамбург инвестициялық дөңгелек үстелі өтті, деп хабарлайды Rail-news.kz.
Дөңгелек үстелге Бавария мен Гамбург бургомистрлері, ірі компаниялардың, бизнес-қауымдастықтардың және жетекші сараптамалық бірлестіктердің өкілдері қатысты.
Іс-шара барысында "KTZ Express" АҚ Бас директоры Қайрат Өтепов қатысушыларға Қазақстанның логистикалық әлеуетін, Еуропа елдері бағытында транзиттік, экспорттық әлеуетті арттыру үшін "ҚТЖ" ҰК" АҚ тобы ұсынатын сервистерді, сондай-ақ ел аумағы арқылы маршруттарда жүктерді тасымалдау жылдамдығына, құнына және сақталуына қолайлы жағдайлар жасау үшін қабылданатын шараларды ұсынды.
Германия бизнес-топтарының өкілдері қазақстандық маршруттар бойынша жүктердің логистикасына жоғары қызығушылық танытып, олардың жаңа геосаяси жағдайдағы маңызды рөлін атап өтті.
Сауда палатасының мәліметінше, бүгінде 160 гамбургтік компания Қазақстанмен белсенді ынтымақтастықта. Өткен жылдың 11 айының қорытындысы бойынша Қазақстан мен Гамбург арасындағы тауар айналымы 2021 жылдың сәйкес кезеңімен салыстырғанда 73% - ке ұлғайып, шамамен 250 млн еуроны құрады.