«Нұрлы жол» вокзалына ұсыныс пен шағым қалдыратын QR код орнатылды

«Нұрлы жол» вокзал кешенінде пікірлер мен ұсыныстар, шағымдар қалдыратын QR код пилотты жоба ретінде орнатылды. Код таңбаланған тақтайшалар вокзалдың күту залы, дәретханалары және анықтама бюросының жанына қойылды.

Вокзалға келген жолаушылар немесе шығарып салушылар, қарсы алушылар ұялы телефонының камерасы арқылы кодты сканерлеп, әрі қарай тиісті сілтемелерге өтіп, пікір білдіреді. Кешеннің технологиялық процесті ұйымдастыру бөлімінің бастығы Ғалия Нүскееваның айтуынша, бұл вокзалдағы сервис сапасы қандай деңгейде екенін анықтау үшін керек.  

– Сканерді басқаннан кейін «пікірлер» деген пункт бар, соны басып, шағым, ұсыныстардың тізімі бойынша сұрақтарға жауап беруге немесе өзі жазу арқылы пікір қалдыруға болады. Кейін вокзал қызметкерлері қалдырылған пікір бойынша мәселені егжей-тегжейлі сұрауы үшін сол жерге телефон нөмірін жазып кетсе болады. Алайда жеке деректері құпия сақталғанын қаласа да өз еркі. Жалпы мұның біздің вокзал мен персоналдың жұмысын жақсартуға септігі тиер деген ойдамыз, – деген Ғалия Нүскеева интерфейс қазақ және орыс тілдерінде жұмыс істейтінін атап өтті.