Шойын жолдың майталман маманы марапатталды

Темір жолға бүкіл өмірін арнап, шойын жолдың майталман маманына айналған азаматтар аз емес. Олардың әрқайсысының еңбек жолы бір кітапқа жүк болады. Кешегі жастар бүгінде аға буынға айналды. Солардың бірі – Атырау станциясының бастығы Алтай Көбегеновті «Ел Құрметі» республикалық қоғамдық қоры «Теміржолға сіңірген еңбегі үшін» төсбелгісімен марапаттады.

Атырау жүк тасымалы бөлімшесінің басшысы Аслан Базарғалиев ұжым алдында станция бастығын құттықтап, Қор атынан Алғыс хат пен төсбелгі табыс етті. Құрметті теміржолшы Алтай Көбегенов – пойыз құрастырушыдан бастап бөлімше басшылығы аралығындағы ұзақ та абыройлы жолдан өткен нағыз маман. Ерен еңбегінің арқасында мерейі талай рет үстем болып, ҚТЖ Құрмет тақтасына да ілінді.  

Ол Алматы теміржол көлігі инженерлері институтын «Темір жол көлігін ұйымдастыру және басқару» мамандығы бойынша бітіріп, жолдамамен Атырауға келеді. Өзі теміржолшылар отбасынан шыққан, саламен жақсы таныс болса да пойыз құрастырушының көмекшісі болып бастап, Құлсары станциясында еңбек етті. Содан маневр, пойыз диспетчері, бас инженер, Мақатта станция бастығы қызметтерін абыроймен атқарып, Атырау жол бөлімшесі бастығының бірінші орынбасары болып та бірнеше жыл жұмыс істеді. 2005 жылы «Адал еңбегі үшін» төсбелгісімен марапатталды. Мақат аудандық мәслихатының депутаты болып, теміржолшылардың әлеуметтік жағдайының жақсаруына да үлесін қосты.  

Алтай Азанқұлұлы басқаратын Атырау станциясы қашан да қоғамдық жұмыстардың бел ортасынан табылады. Мектептерге де қамқорлық жасап, аз қамтылған отбасыларға да жәрдемдеседі, теміржолшылардың тұрмыстық мәселелерін шешуге атсалысады.