Батыста жолды қардан тазалау жұмысы тәулік бойы жүріп жатыр
Атырау облысы бойынша меншікті тілші
Батыс өңірдің теміржолшылары үшін жазда жолды құмнан, қыста қардан тазалау – үйреншікті жұмыс. Десе де, жүздеген шақырымдарға созылған темір жолда биыл толассыз жауған қарды уақытылы тазалап отыру оңайға соғып жатқан жоқ.
Негізгі күш Атырау жол дистанциясына түсіп отыр. Әрине қар тазалайтын СМ-2, СЗПМ техникалары бар, десе де, машиналарды магистраль бойында қар аса қалың жерлерде пайдаланғаны болмаса, станция-бекеттердегі қарды қолмен тазалаған өнімді деседі жолшылар.
– Дина Нұрпейісова станциясынан бастап Сағызға дейінгі ұзындығы 555 км жолды өз күшімізбен тазалап жатырмыз. Күніне осы жұмысқа 100-108 адамнан бөліп отырмыз. Ең алдымен Мақат, Атырау, Ақжайық, Махамбет, Аққыстау сынды үлкен станцияларды, сосын шағын бекеттерді қардан тазарту жұмыстарын жүргізудеміз, – дейді Атырау жол дистанциясының бастығы Жәнібек Жөнтұрбаев.
Сенбі, жексенбі күндері толассыз жауған қар сейсенбі күні қайта жалғасып, айлық мөлшері шамадан асып кетті. Оған қоса жел екпіні де күшейіп борандатып жатыр. Жалғыз жолшылар емес, Атырау жүк тасымалы бөлімшесі басшысының «2022-2023 жылға қысқы мерзімге арналған қармен күрес жұмыстарын жүргізу» жедел жоспарына сәйкес аймақтағы барлық теміржол кәсіпорындары қар тазалау науқанына жұмылған. «Ауысымнан шыққан адамдарды қар тазалау жұмыстарына тартып жатырмыз. Күндіз 19 адам бөлінсе, түнгі уақытқа 15 адам бөлдік. Қазір станция басында қар тазалау жұмысы тәулік бойы жүріп жатыр» дейді Ақжайық станциясының бастығы Бағытжан Абдрахманов.