Вокзалдағы қоғамдық тәртіп мәселесі қаралды
«Қазақстан теміржолшысы» газетінің тілшісі
«Нұрлы жол» вокзал кешенінде жолаушыларға қызмет көрсету кезінде қоғамдық тәртіпті қадағалауды қамтамасыз ету мәселелері бойынша кездесу өтті.
Жиынға аталған вокзалдың технологиялық процесті ұйымдастыру бөлімінің қызметкерлері мен Астана станциясының желілік полиция бөлімшесінің басшылары қатысты. Олар мекемелер арасындағы өзара қарым-қатынасты жақсарту және «2021-2023 жылдарға арналған мүлікті қорғау бойынша бағдарлама», «Экстремизм және терроризммен күрес» мәселелерін талқылады. Вокзал бастығының орынбасары Айгүл Өксікбаеваның айтуынша, вокзал кешені қызметкерлеріне жолаушыларға жеке заттарын қараусыз қалдырмау туралы түсіндіру жұмыстарын жүргізу реті, жүктері жоғалғаны анықталса, бірден полиция қызметкерлеріне хабарлау қажеттілігі айтып түсіндірілді.
– Вокзал кешені адам көп шоғырланатын қоғамдық орын болғандықтан мұндағы қауіпсіздік мәселесіне ерекше назар аударылады. Әсіресе жүктерін немесе құнды заттарын жоғалтып алатындар жиі кездеседі. Асығып жүріп, олар қайда қойғанын білмей қалуы немесе ұрылар қолды қылуы мүмкін. Осы ретте біз вокзал кезекшілерімен тығыз жұмыс жүргіземіз, – дейді «Нұрлы жол» вокзал кешені ЖПБ бастығы, полиция майоры Беслан Дуишвили.