Теміржол саласында Франциямен ынтымақтастық артып келеді
«Қазақстан теміржолшысы» газетінің тілшісі
Францияның Қазақстандағы Төтенше және Өкілетті елшісі Дидье Канесспен кездескен ҚР Индустрия және инфрақұрылымдық даму министрі Марат Қарабаев көлік және қорғаныс өнеркәсібі саласындағы ынтымақтастық жобаларын іске асыру бойынша пікір алмасты.
Кейінгі жылдары Қазақстанда Alstom, Idemia, Tav Airports Holding, Airbus, IVECO және Saint-Gobain компанияларымен бірлескен жобалар табысты іске асырылып жатқаны мәлім. Осы жұмыстың аясында әуе кемелері мен арнайы автокөлік техникасын, электровоздар және бағыттамалы электр жетектерін жеткізіп, құрастыру, заманауи қауіпсіздік жүйелерін енгізу, сондай-ақ теміржол қозғалысы мен құрылыс материалдарын өндіру саласында жемісті әріптестік байланыс жолға қойылған.
Марат Қарабаев айтқандай, Франция Қазақстанның экономикасына инвестиция салатын ірі инвесторлардың бестігіне кіреді. Мәселен, 2022 жылдың қорытындысы бойынша екі ел арасындағы тауар айналымы 30,3%-ке өсіп, 4 млрд долларға жеткен. «Франция – еліміздің стратегиялық серіктесі және бұл мемлекетпен сенімді достық қарым-қатынасымыз орнаған. Қазақстанда франциялық капиталдың қатысуымен 170-тен астам компания жұмыс істейді. Оның ішінде Total, Orano, Alstom, Danone, Vicat, Saint Gobain және тағы да басқа транс-ұлттық компаниялар бар», – деді ҚР ИИДМ басшысы.