ТХКМ – табысты дәлізге айналып келеді
«Қазақстан теміржолшысы» газетінің тілшісі
Транскаспий дәлізімен жүк тасымалдау көлемі артып келеді. Бұл туралы «Түркі әлеміндегі экономикалық байланыс және интеграция» тақырыбында өткен сарапшылар отырысында Әзербайжанның Қазақстандағы Елшісі Агалар Атамоғланов айтты.
– Өткен жылы Әзербайжан, Қазақстан және Түркияның Сыртқы істер, Көлік министрлері Баку мен Ақтау қалаларында екі рет кездесу өткізді. Осы кездесулердің қорытындысында қабылданған жол картасы орта дәліздің, яғни «Шығыс-Батыс» транскаспий халықаралық орта дәлізінің дамуына тың серпін берді. Қазірдің өзінде аталған бағытта айтарлықтай өсім байқалады. Ол алдағы болашақта да ұлғая түсері сөзсіз, – деді Әзербайжан Елшісі.
Оның айтуынша, транзиттік дәлізді дамыту мақсатында Баку халықаралық әуежайының өткізу қабілеті жылына 15 млн тоннадан 25 млн тоннаға дейін артқан. Ал Баку – Тбилиси – Карск теміржолының өткізу мүмкіншілігі 1 млн тоннадан 5 млн тоннаға дейін ұлғайтылды.
Осы отырыста Әзербайжанның бұрынғы Премьер-министрі Гасан Гасанов түркі мемлекеттерінің ынтымақтастық үшін әлеуеті өте жоғары екенін атап өтті.
– Елдерімізде бізді мемлекетаралық балама ұйымдармен стратегиялық серіктестік деңгейіне шығара алатын әлеует бар. Түркі әлемі елдері «Солтүстік-Оңтүстік», «Батыс-Шығыс» транзиттік бағыттары ретінде маңызды аумақты алып жатыр. «Түркі әлемі көзқарасы-2040» құжатында «Шығыс-Батыс» транскаспий халықаралық орта дәлізін тек қысқа ғана емес, сонымен бірге қауіпсіз әрі кедендік және транзиттік процедуралары үйлесімді, тиісті халықаралық конвенциялардың тиімді орындалуын қамтамасыз ететін табысты дәлізге айналдыру көзделген, – деді ол.