Тасқынға қарсы 45 пойыз жасақталып жатыр
«Қазақстан теміржолшысы» газетінің тілшісі
«ҚТЖ» ҰК» АҚ су тасқыны кезеңінде шойын жол мен жасанды құрылыстарды сақтап, сонымен қатар пойыздардың үздіксіз қатынауын қамтамасыз етуге арналған техникалық-ұйымдастыру іс-шараларын бекітті.
Жалпы еліміздегі республикалық маңыздағы жолдарды тексерудің нәтижесінде 396 қауіпті учаске, 68 көпір және 768 су өткізу құбыры анықталып, тасқын қаупін сейілтуге жұмыс істейтін 700-ден астам арнайы техника бөлінген. Индустрия және инфрақұрылымдық даму министрі Марат Қарабаевтың айтуынша, өткен жылдардың тәжірибесіне талдау жасалып, барлық өңірде тасқын суды өткізу бойынша қауіпті орындардың тізбесі анықталып отыр.
– Көктемгі су тасқыны кезеңінде тәуліктік кезекшілік пен қауіпті орындарға бақылау жүргізіледі. Тұтастай алғанда 3 578 көпірді, 6 мыңнан аса су өткізу құбырын, таулы арықтарды және жол жыраларын қар мен мұздан тазарту жұмыстары басталды. Еліміз бойынша шойтас пен рельсті пакеттер және кондициясыз темірбетонды шпалдармен жарақталған тасқынға қарсы 45 пойыз жасақталып жатыр, – деді ИИДМ басшысы.
Су тасқынына қарсы іс-шараларды уақытылы қамтамасыз ету үшін барлық қауіпті учаскеде тәуліктік кезекшілік пен күнделікті бақылау жүргізіліп келе жатқанын жеткізді. Қажетті жұмыстарды жедел ұйымдастырып, тасқын қаупін алдын алу мақсатында қажетті инертті және басқа да материал толық көлемде дайындалған. Атап айтқанда, 20 мың текше метр құм, 6 мың текше метр шойтас, 8 мың текше метр қиыршық тас, сондай-ақ 18 мың текше метр құм-қиыршық тас қоспасы әзірленген.