Ең әдемі мереке...

Халықаралық әйелдер күні қарсаңында Қызылорда магистральдық желі бөлімшесінде өткен мерекелік басқосудың көркі қыз-келіншектер болды. Жиын ерлер қауымының бастамасымен өзгеше форматта ұйымдастырылды.

Мәжіліс залын мерекелік нақышта безендірген жігіттер әрбір орындыққа шар байлап, ұжымның қыздарын әсем әуен мен алқызыл раушан гүлімен қарсы алды. Қызылорда магистральдық желі бөлімшесінің директоры Ибраким Басықараев нәзік жан иелерін шын жүректен құттықтап, 8 наурыз – ең әдемі де аяулы мереке деді. Сонымен қатар, Қызылорда вокзалының анықтама беру жөніндегі кеңесшісі Рая Қуандықова, өндірістік тазалықшы Қалдыгүл Темірболатова, Өртке қарсы қызметінің диспетчері Камиля Ахметова, Персоналды басқару бөлімінің менеджері Бақыт Оразбай, Экономика бөлімінің инженері Жұлдыз Бисембаева, Еңбек және жалақы бөлімі инженері Айжан Абдреева, бөлімшенің машинист-хабарлаушысы Аружан Арынова, Қалпына келтіру пойызының жолсерігі Дана Сұңқарбаева, бөлімше мұрағатшысы Зәуре Айдарова мен қаржыландыру бөлімінің менеджері Нұргүл Енсеповаға адал да мінсіз қызметтері үшін алғыс айтып, құрмет грамоталарын табыс етті. 

Марапаттау рәсімі арасында викториналық сергіту сауалдарына жауап берген қыз-келіншектер арнайы сыйлықтарға ие болды. Ал Қызылорда есеп тобының басшылары Ақмарал Маханбетова, Айнұр Аяпбергенова, Оксана Дон мен Қазалы есеп тобының жетекші маманы Анар Берденоваға бөлімше бастығы мен кәсіподақ ұйымы төрайымының құрмет грамоталары табысталды. 

Басқосу бөлімше қызметкерлерінің ұл-қыздарының өнерімен айшықтала түсті. Шахмардан Алмағанбетовтің қыздары Амина мен Айша аналарына арнап жаттаған тақпағын айтып берсе, Мөлдір Акишованың баласы Мейірлен Жанболат пен Ләззат Ермұратованың қызы Аяулым Мирамбек әсем әннен шашу шашты. Шараны ұйымдастыруға атсалысқан кәсіподақ ұйымының төрайымы Ажар Ерманова жас өнерпаздарды да сыйлықсыз қалдырмады.