Әлемді тербеткен әйелдерге әдемі тілектер айтылды
«Қазақстан теміржолшысы» газетінің тілшісі
8 наурыз – Халықаралық әйелдер күні қарсаңында «ҚТЖ» ҰК» АҚ орталық ғимаратын қызыл-жасылды, сары-көк жауқазын гүлдер жаулап алғандай еді. Қыз-келіншектер шетінен сұлу, жүздері жарқын, көңілдері көтеріңкі, әрқайсысының қолында қызғалдақ, раушан гүлдері.
Гүлді гүл құшақтап бара жатқандай әсерлі. Теміржолшы жігіттер өздерімен иық тіресе, бір жағадан бас, бір жеңнен қол шығара жұмыс істеп жүрген әріптес нәзік жан иелерін таңнан бастап құттықтауға кірісіп кеткен. Кіре берісте гүлмен қарсы алып, тәтті шоколодтар ұсынып, ізгі тілектерін жеткізіп бәйек болуда.
Бұл күні «ҚТЖ-Жүк тасымалы» ЖШС-нің азаматтары да жүк тасымалын ұйымдастыру шаруасын дөңгелетіп жүрген әріптес қыз-келіншектерін төл мерекелерімен құттықтады.
Салтанатты шарада Досбол Күлекеев, Нұржан Келбұғанов, Мұхтар Жамбылов, Әділжан Есмұханбетов сынды «ҚТЖ-Жүк тасымалы» ЖШС-нің топ-менеджерлері және кәсіподақ ұйымының төрағасы Ермек Төлегенов сөз алып, еліміздің теміржол магистралында жүк тасымалын ұйымдастырып, пойыздардың қозғалыс қауіпсіздігін қамтамасыз етіп, тағысын тағы қызметтердің тізгінін алған қыз-келіншектерге ақжарма тілектерін жаудырды.
Өндірісте жауапты жұмысты атқарып, басшылық қызметті де қатар алып жүрген әйелдердің үйде қамқоршы ана, аяулы әпке, асыл жар екенін айтып, арулардың адамзат әлемінде орны ерекше екенін ерлер мазмұнды сөзбен, әдемі тілмен жеткізді.
«Бір қолымен бесікті, бір қолымен әлемді тербететін» әйелдерге Отан Ана, Жер Ана сияқты қасиетті ұғымдарды теңеу бекер емес. Сұлулық та, жылулық та, мейірім мен ізгілік те әйелдер бойынан табылған. Сіздерді бүгінгі төл мерекелеріңізбен құттықтап, дендеріңе саулық, отбасыларыңа амандық, еңбектеріңе жеміс тілейміз! Сіздер барда теміржолдың жұмысы ілгерілеп, өркендеп, өрістей беретініне сенімдіміз, – деп ізгі тілектерін білдірді құттықтаушы азаматтар.
Құттықтау лебіздер қыз-келіншектерге грамоталар мен алғыс хаттар, сертификаттар мен гүл шоқтарын және де тәтті торттар тартумен жалғасты. Салтанатты ресми шарадан соң «ҚТЖ-Жүк тасымалы» ЖШС ұжымының қыз-келіншектеріне арналған тамаша концерт болып, онда ән-жырдан шашу шашылды.
