«Жеті қадам» жобасына 6 жас теміржолшы қатысты
«Қазақстан теміржолшысы» газетінің тілшісі
«Самұрық-Қазына» АҚ компаниялар тобындағы жас көшбасшылардың білімі мен біліктілігін дамытуға арналған «Жеті қадам» жобасының 2-ші модулі Ақтау қаласында өтті. Оған барлығы 50 адам, соның ішінде «ҚТЖ» ҰК» АҚ-дан 6 жас теміржолшы қатысты.
Биыл ақпанда модульдік бағдарламаның 1-ші модулі өткен болса, наурыздағы 2-модуль «Жобалық басқару» тақырыбына арналды. ҚТЖ-дан қатысқан жастар – «Вагонсервис» АҚ, Көпфункционалды қызмет көрсету орталығы, Астана вокзал шаруашылығы, «ҚТЖ-Жүк тасымалы» ЖШС және әлеуметтік саясат департаментінің қызметкерлері.
– Бұл жобаға өту үшін бұған дейін бірнеше сынақтан өттік. Алдымен 2022 жылы жастар форумында өткен челленджге қатысушылар арасынан 50 адам іріктеліп алынған. Модульдік оқыту жобасының мақсаты – Қордың компаниялар тобындағы жас мамандардың көшбасшылық әлеуетін арттыру, оларды басқару құзыреттілігі техникаларымен таныстыру, коммуникациялық машықтарын дамыту, командада жұмыс істеуге бейімдеу, бюджеттік жоспарлау қағидаттарын ұғындыру, – дейді жобаға қатысушылардың бірі Астана теміржол вокзалы кешенінің вокзалды пайдалану бөлімінің менеджері Әйгерім Садықова.
Модульдік оқыту мерзімі – 2023 жылдың ақпаны мен тамыз айларының аралығы. Әр модульдік оқыту екі күннен тұрады. Жалпы «Жеті қадам» бағдарламасы 7 модульден тұрады және әр модуль Қазақстанның әр қаласында өткізіледі. Әр модульден кейін қатысушылар үй тапсырмасын орындап, балл жинайды. Сол тапсырманы дұрыс орындаған қатысушылар ғана келесі модульге өте алады. Келесі модуль еліміздің басқа қаласында ұйымдастырылады.