Болашақ – контейнерлік тасымалда

Жүк тасымалындағы басты критерий: жылдамдық, сенімділік және қауіпсіздік. Ал оны қамтамасыз ететін – контейнерлік тасымалдау. Қазақстандық жүк жөнелтушілер контейнерлік тасымалдаудың артықшылықтарын осылай жоғары бағалап, болашақ контейнерлік тасымалда деп санайды.

Қазір жүкті контейнермен тасымалдау көлемі артып келеді. Былтырдың өзінде ҚТЖ желісі бойынша тасымалданатын экспорттық жүктердің жалпы көлеміндегі контейнерлік тасымалдың үлесі 4,4%-ті (3,5 млн тонна) құраған.  

«ҚТЖ» ҰК» АҚ-ның логистика жөніндегі басқарушы директоры Ерлан Қойшыбаев, контейнерлендіру – теміржол логистикасының ең перспективалы және сонымен бірге ең күрделі аспектісі. Сондай-ақ, әлемдегі эпидемиялар мен геосаяси дағдарыстарға қарамастан бірқалыпты жұмыс істей алатын жылдам, сенімді көлік түрі екенін айтады.  

Қазіргі таңда мұнай өнімдері, тыңайтқыштар, түсті рудалар, құрылыс жүктері, қара металдар сияқты басқа да жүк түрлері бойынша экспорттық тасымалдардағы контейнерлік тасымалдау көлемінің артып келе жатқаны байқалады. Мәселен, өткен жылы контейнердегі экспорт көлемі 30 пайызға өскен. Оның ішінде астық өнімдері бар 49 мыңнан астам ЖФЭ шетелдерге шығарылған. Бұл көрсеткіш 2021 жылмен салыстырғанда 4,2 есеге жоғары болып отыр. Жүк Қытайдың Алашанькоу, Үрімші, Сиань, Чунцин станцияларына, сондай-ақ Tранскаспийлік халықаралық көлік бағдары арқылы Түркияның Мерсин порты бағытына жөнелтілді.  

Сонымен қатар экспортқа бағытталған контейнердегі мұнай өнімдері 14,4 есеге, ұнтақтау өнімдері (кебек, құрама жем, бидай ұны) 6,3 есеге артқан. Жүктің басым бөлігі Қытайға жөнелтілді.  

Дәнді дақылдардан бөлек, басқа да көптеген номенклатуралар контейнермен жөнелтуге жарамды жүктерге жатады. Мысалы, өткен жылдың қараша айында Ydd Corporation Қарағанды ферроқорытпа зауытынан Түркияға ферросилиций тиелген пилоттық контейнерлік пойыз жөнелтілсе, тамыз айында Тәжікстанның алтын өндіру саласындағы ірі кәсіпорындардың бірі – «Зарафшон» БК ЖШҚ-дан Спитамен – Достық бағыты бойынша түсті металдар кені бар алғашқы контейнерлік пойыз жөнелтілген. Сондай-ақ Жітіқара станциясынан Вьетнамның Йен Вэ станциясына контейнерлерде «Қостанай минералдары» тау-кен өндіру компаниясының асбест өнімдері, флекситенктерде қазақстандық өсімдік майы Қытайдың Шанхай, Сиань және Нантун қалаларына тұрақты түрде жөнелтіліп келеді. Ал түсті металдарды – контейнерлерде TMTM арқылы Түркия мен Грузия бағытында жөнелту ұйымдастырылды.  

Бүгінгі таңда контейнерлік экспорттық жүктердің әлеуеті шамамен 22 млн тоннаны немесе тасымалданатын экспорттық жүктердің жалпы көлемінің 28 пайызын құрап отыр.