Бірлік түбі – береке

Қазақстан халқы үшін Наурыз мейрамы – көктем мен жаңаруды айшықтайтын ұлы мереке. Осынау берекелі мерекені Астанадағы Локомотив құрастыру зауыты да кеңінен атап өтті.

Зауыт алаңында ұлттық киіз үй орнатылып, темірді қамырдай илеп, ұршықша иіріп жүрген өндірістегі ер-азаматтар бұл жолы ұлттық ойындарда жарысқа түсіп бақ сынасты. Ал енді өнерге жақын жігіттер мен қыздар ән салып, би биледі. Көрермендер спорттық ойын жарыстарын тамашалап, қиқуға басса, ұжымның өз күшімен дайындалған концерттік бағдарламаларда әріптестеріне қол соғып, қошемет көрсетті. Бұл күні зауыт ұжымынан бөлек арнайы шақырылған қонақтар қатары да көп болды. Ұлыстың ұлы күнін тамашалаған меймандар, зауыт қызметкерлері киіз үйді аралап, наурыз мерекесіне орай жайылған ас та төк дастарханнан дәм татты.  

Мереке барысында жарыс жеңімпаздары мен белсенді қатысушылар естелік сыйлықтармен марапатталды, жиналған жұрттың қуанышында шек болмады.  

Биыл Локомотив құрастыру зауытының ұжымы Наурыз мерекесін ерекше көтеріңкі көңіл күймен қарсы алды. Зауыт қызметкерлері отбасымен, балаларымен келді. Балалар да әртүрлі ұлттық ойындарға қатысып, оларға қолдау білдірген ағалары, әкелері балалық шақтарына оралғандай әсер алды.  

«Наурыз мерекесі биыл тамаша тойланып отыр. Ұжымның арқа-жарқа мерекені тойлауы үшін бірнеше жерден дастархан жайылды, бата берілді. Біздің азаматтар өнерден де, спорттан да құралақан емес екенін көрсетті. Мұндай іс-шаралар ұжымның бірлігін арттырып, әріптестер арасында жылы қарым-қатынасты нығайтатынын, ал бұл өз кезегінде кәсіпорынның жұмыс өнімділігіне тікелей әсер етеді», – дейді зауыт басшысы Марат Тілеубаев.  

Айта кетсек, «Локомотив құрастыру зауыты» АҚ – еліміздегі Evolution сериялы тепловоздарды шығаратын жалғыз зауыт. Он төрт жылға жуық жұмыс істеп жатқан зауыт осы уақыт аралығында 460 локомотив шығарды. Осы жылы өндірістік жоспарды екі есе артып, жылына 90-ға жуық локомотив шығаруды жоспарға қойған.  

Зауыт ұжымы Наурыз баршамызға ынтымақ пен сәттілік алып келсін, еліміз өркендей берсін деген ізгі тілектерін білдіреді.