Қытай елшісімен Транскаспий көлік бағытын дамыту жолдары талқыланды
Қазақстан мен Қытай арасында Транскаспий халықаралық көлік бағытын дамыту жолдары талқыланды. Мәселе ҚР Индустрия және инфрақұрылымдық даму министрі Марат Қарабаев пен Қытай Халық Республикасының Қазақстандағы елшісі Чжан Сяомен кездесуде көтерілді, деп хабарлайды Rail-news.kz.
Министрліктің баспасөз қызметінен мәлім еткендей, кездесу барысында екіжақты сауда-экономикалық әріптестіктің перспективасы талқыланды.
Атап айтқанда, кездесуде көлік-транзит, азаматтық авиация және өнеркәсіп салаларындағы ынтымақтастықты арттыру мәселелері қаралды. Оның ішінде жаңа индустриялық өндіріс орындарын құру және Транскаспий халықаралық көлік бағытын дамыту жолдары талқыланды.
Кездесу барасында 2022 жылы Қазақстан мен Қытай арасындағы экспорттық-импорттық және транзиттік жүк тасымалдарының жалпы көлемі 3 млн тоннаға артқаны ерекше атап өтілді.
Марат Қарабаев айтып өткендей, жыл сайын екі ел арасында жүкті көлікпен тасымалдауға қатысты 50 мыңнан астам көлемде қағаздағы рұқсат бланкілерімен алмасу жүреді.
«Рұқсат құжаттарымен алмасу процесін жеңілдету және мемлекеттеріміздің автотасымалдаушыларының қолайлығы үшін оларды цифрландыруды ұсынамыз», - деді Марат Кәрімжанұлы.
Сонымен қатар екі елдің шалғайдағы өнеркәсіптік және теңіз порттары орналасқан өңірлерге жүк тасымалын қамтамасыз ету үшін қосымша маршруттарды белгілеу ұсынылды.
Бұдан бөлек ҚР ИИДМ басшысы тұрақты авиарейсті ұлғайту бойынша жұмысты жалғастыруға дайын екендігін айтты. М.Қарабаевтың сөзінше, биылғы көктем-жаз аралығында аптасына 24 рейске дейін іске асыру көзделген.
Кездесудің қорытындысына сәйкес екі мемлекеттің ресми өкілдері іскерлік әңгімеге ризашылықтарын жеткізіп, өзара тиімді әріптестікті дамытудың маңыздылығын атап өтті.